ޒުވާނުން ބާރުވެރިކުރުމަށް ދިރާގުން ކުރިއަށްގެންދާ ދިރާގު އެޕްރެންޓިސްޝިޕް ޕްރޮގްރާމް ގައި ބައިވެރިވުމަށް މިއަހަރު 25 ކުދިންނަށް ފުރުޞަތު ލިބިއްޖެއެވެ. ދިރާގުގެ ހެޑް އޮފީހުގައި މިއަދު ކުރިއަށްދިޔަ ރަސްމީޔާތުގައި ދިރާގު އެޕްރެންޓިސްޝިޕް ޕްރޮގްރާމަށް މިއަހަރު ހޮވުނު ކުދިންނަށް ވަނީ އެންރޯލްމަންޓް ލެޓަރ ހަވާލު ކޮށްފައެވެ.
ދިރާގުގެ އިޖުތިމާއީ ޒިންމާ ގެ ދަށުން ޒުވާނުން ވަޒީފާއަށް ހޭލުންތެރިކޮށް، ވަޒީފާގެ މާޙައުލުގައި ތަޖުރިބާ ހޯދުމުގެ ފުރުޞަތު ދިނުމުގެ ގޮތުން ކުރިއަށް ގެންދާ ދިރާގު އެޕްރެންޓިސްޝިޕް ޕްރޮގްރާމަކީ 2009 އަހަރުން ފެށިގެން ޒުވާނުން ބާރުވެރިކުރުމަށް ދިރާގުން ފަށާފައިވާ ޕްރޮގްރާމެކެވެ. ޒުވާނުންގެ ތަރައްޤީއަށް މަސައްކަތް ކުރުމާއި ޒުވާނުން ބާރުވެރިކުރުމަކީ ދިރާގުގެ އިޖުތިމާއީ ޒިންމާގެ ދަށުން ހިނެގޭ ޕްރޮގްރާމްތަކުގެ ތަރޭގައި ވަރަށް ޚާއްޞަ އަހައްމިޔަތުކަމެއް ދެވިފައިވާ ދާއިރާއެކެވެ. ދިރާގުން މި ޕްރޮގްރާމް މެދުވެރިކޮށް ގިނަ ޒުވާނުންތަކެއް މަސައްކަތުގެ މާޙައުލަށް އަހުލުވެރިކުރުވާ، މަގުތަކެއް ފަހިކޮށްދީފައިވާކަމީ ޒުވާނުންގެ ތަރައްޤީއަށް ދިރާގުގެ ފަރާތުން ކުރަމުން އަންނަ ވަރަށް މުހިންމު މަސައްކަތެކެވެ.
މި ޕްރޮގްރާމް މެދުވެރިކޮށް، ދަރިވަރުން ވަޒީފާގެ މާހައުލަށް ހޭލުންތެރިކުރުމަށް ޚާއްޞަ ޓްރެއިނިން ޕްރޮގްރާމް ތައް ކުރިއަށް ގެންދެވެއެވެ. މި ޕްރޮގްރާމް އަމާޒު ކުރެވިފައިވަނީ އުމުރުން 18 އަހަރާއި 24 އަހަރާއި ދެމެދުގެ ދިވެހި ޒުވާނުންނަށެވެ. މިގޮތުން އޭލެވެލް ނިންމާފައިވާ ދަރިވަރުންނަށް، މި ޕްރޮގްރާމް މެދުވެރިކޮށް ޓްރެއިނިން ލިބި، ވަޒީފާގެ މާހައުލުގައި ތަޖުރިބާ ލިބުމުގެ ފުރުޞަތު ނުހަނު ފުރިހަމަ ގޮތުގައި ލިބިގެންދެއެވެ.
މިއަހަރު މި ޕްރޮގްރާމުގައި ޖުމްލަ 25 ކުދިން ވަނީ ބައިވެރިވެފައިއެވެ.
މި ޕްރޮގްރާމްގައި މިހާތަނަށް ޖުމްލަ 149 ކުދިން ބައިވެރިވެފައިވެއެވެ. މީގެ ތެރެއިން ގިނަ ކުދިންނަކީ މިހާރު ދިރާގުގެ އިތުރުން ރާއްޖޭގެ ތަފާތު ކުންފުނިތަކުގައި ޒިންމާދާރު ވަޒީފާތައް ކާމިޔާބު ކަމާއެކީ އަދާކުރަމުން އަންނަ ޒުވާނުންނެވެ. މިއީ ދިރާގު އެޕްރެންޓިސްޝިޕް ޕްރޮގްރާމް ގެ ކާމިޔާބު ރަމްޒުކޮށްދޭ އެއްހެއްކެވެ.
މި ޕްރޮގްރާމް ގައި ބައިވެރިވުމުގެ ފުރުޞަތު އޮތީ ހަމައެކަނި މާލޭގައި ތިބި ޒުވާނުންނަކަށް ނޫނެވެ. މާލޭގެ އިތުރުން ރާއްޖޭގެ އަށް ސަރަހައްދެއްގައި ޤާއިމުކޮށްފައިވާ ދިރާގުގެ އޮޕަރޭޝަން ސެންޓަރުތަކުގައި މި ޕްރޮގްރާމް ކުރިއަށް ދެއެވެ. މިހެންކަމުން އަމިއްލަ ރަށުގައި ނުވަތަ އަތޮޅުގައި ހުރެގެން މި ފުރުޞަތުގެ ބޭނުން އެންމެ ފުރިހަމަގޮތުގައި އެ ޒުވާނުންނަށް ހިފޭނެއެވެ.
މި ޕްރޮގްރާމްގައި ދިރާގުގެ ވަރަށް ގިނަ ދާއިރާތަކުގައި މަސައްކަތް ކުރުމުގެ ފުރުޞަތު ލިބިގެންދާނެއެވެ. މީގެ ތެރޭގައި ސޭލްސް، މާކެޓިންގ، ޕްރޮކިއުމަންޓް އެންޑް ޕްރޮޕަޓީ މެނޭޖްމެންޓް، ހިރުމަން ރިސޯސަސް،ފައިނޭންސް، އިންފޮމޭޝަން ސިސްޓަމްސް، ނެޓްވޯކްސް އަދި ކަސްޓަމަރ ސޮލިއުޝަންސް ޑިޕާޓްމަންޓް ހިމެނެއެވެ. އަދި ބައިވެރިވާ ކުދިންނަށް އެންމެ ފުރިހަމަ ގޮތުގައި އެހީތެރިވުމުގެ ގޮތުން ކޮންމެ ކުއްޖަކަށް ދިރާގުގެ ފަރާތުން މެންޓޯ އެއް ކަނޑައެޅިފައިވާނެއެވެ.
މި ޕްރޮގްރާމްތެރޭގައި ހިމެނޭ ރަސްމީ ކޯސްތަކާއި ޓްރެއިނިން ތަކުގެ ތެރޭގައި ސޮފްޓް ސްކިލްސް ޑިވެލޮޕްމެންޓް ޓްރެއިނިންގް ވެސް ހިމެނެއެވެ. މީގެ ތެރޭގައި: އެތިކްސް، ޓައިމް މެނޭޖްމަންޓް، ކޮމިއުނިކޭޝަންސް ސްކިލސް، އަދި ވަޒީފާ ތަކަށް ކުރިމަތިލާން ފަސޭހަވާނޭ ގޮތަށް، ރަނގަޅު ސީވީއެއް ތައްޔާރުކުރުން، ޖޮބް އިންޓަވިއު ސްކިލްސް ފަދަ ޓްރެއިނިން ހިމެނެއެވެ.
ދިރާގުގެ އަމާޒަކީ ކުރިއަށް އޮތް މުސްތަގުބަލުގައި ވެސް ރާއްޖޭގެ ޒުވާނުން ކުރިއެރުވުމަށް މިފަދަ އިތުރު ފުރުޞަތުތައް ފަހިކޮށް ދިނުމެވެ.
