ކުރިއަށް އޮތް ދުވަސްތަކުގައި ރާއްޖެއާ ޑެންމާކުގެ ގުޅުން އިތުރަށް ހަރުދާވެގެންދާކަމުގެ ޔަޤީންކަން ޑެންމާކުން ރާއްޖެއަށް ކަނޑައެޅުއްވި އާސަފީރު ވިދާޅުވެއްޖެއެވެ.
ޑެންމާކް ސަރުކާރުން ރާއްޖެއަށް ކަނޑައެޅުއްވި އާ ނޮން-ރެޒިޑެންޓް ސަފީރު މިސްޓަރ ޕީޓަރ ޓަކްސަ-ޖެންސެން، މިހެން ވިދާޅުވީ އެމަނިކުފާނުގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް މިއަދު އަރުއްވުމަށްފަހު ދެއްކެވި ވާހަކަފުޅުގައެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ފަތްކޮޅު އެރުއްވުމަށްފަހު، ޑެންމާކްގެ އާ ސަފީރާ ރައީސުލްޖުމްހޫރިއްޔާ ބައްދަލުކުރައްވައި، ސަފީރަށް ތަހުނިޔާ ވިދާޅުވިއެވެ.
މި ބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޑެންމާކްގެ ފަރާތުން ކުދި ޖަޒީރާ ޤައުމުތަކަށް، ޙާއްޞަކޮށް ރާއްޖޭގެ ތަރައްޤީއަށް،އަބަދުވެސް ވެދެއްވަމުން ގެންދަވާ އެހީތެރިކަމާއި އެއްބާރުލެއްވުން ފާހަގަކުރައްވައި އެޤައުމުގެ ސަރުކާރަށް ޝުކުރު އަދާ ކުރެއްވިކަމަށް ރައީސް އޮފީހުން ވިދާޅުވެއެވެ.
ރައީސް އޮފީހުން ހާމަކުރައްވާފައިވާގޮތުގައި މިއަދުގެ ބައްދަލުވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޑެންމާކް ސަރުކާރުން އިސްނަންގަވައިގެން ކުރިއަށް ގެންދަވާ ތިމާވެށި ރައްކާތެރިކުރުމުގެ މަޝްރޫޢުތަކުގެ ތެރެއިން ކާބަން ފްރީ އެނަރޖީ ސޮލިއުޝަނެއް ރާއްޖެއަށް ހޯދުމަށް ޝައުގުވެރިވާކަމުގައި ވިދާޅުވިއެވެ. މީގެ އިތުރުން، ރައީސުލްޖުމްހޫރިއްޔާ ވަނީ ރާއްޖޭގެ ތަރައްޤީއަށްޓަކައި ކުރައްވަމުން ގެންދަވާ މަސައްކަތްތަކުގެ މައްޗަށް އަލިއަޅުއްވާލައްވާ ދެ ޤައުމުގެ ދެމެދުގައިވާ ގުޅުން އިތުރަށް ފުޅާކުރެވޭނެ ދާއިރާތަކާބެހޭގޮތުން ޑެންމާކްގެ ސަފީރާ މަޝްވަރާކުރައްވާފައެވެ.
ޑެންމާކްގެ އާ ސަފީރު ދެއްކެވި ވާހަކަފުޅުގައި އެމަނިކުފާނު ރާއްޖެ އައުމުން ދެންނެވި ހޫނު މަރްޚަބާ ޤަބޫލުފުޅުކުރައްވާ ކަމުގައާއި، ކުރިއަށް އޮތް ދުވަސްތަކުގައި ރާއްޖެއާއި ޑެންމާކާ ދެޤައުމުގެ ދެމެދުގައި އިތުރަށް ގުޅުން ބަދަހިވެގެންދާނެކަން ޔަޤީން ކުރައްވާ ކަމުގައި ވިދާޅުވިކަމަށްވެސް ރައީސް އޮފީހުން ހާމަކުރައްވައެވެ.
