ސައޫދީ އަރަބިއްޔާގެ މައްކާގައި މާދަމާ އޮންނަ ގަލްފް ގައުމުތަކުގެ އެންމެ އިސްވެރިންނާއި، އަރަބި ގައުތަކުގެ އެންމެ އިސްވެރިންގެ ބައްދަލުވުމުގައި ޤަޠަރުގެ ބޮޑުވަޒީރު ޝައިޚް ޢަބްދުﷲ ބިން ނާޞިރު އާލްޘާނީ ބައިވެރިވެވަޑައިގަންނަވާނެކަމަށް އަލްޖަޒީރާ އިން ބުނެފިއެވެ. މި ދެ ބައްދަލުވުމަކީ ގަލްފުގައި މިފަހުން ހިނގައި ދިޔަ "އުދުވާނީ ހަމަލާތަކާމެދު" މަޝްވަރާކުރުމަށް ސައޫދީ އަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒުގެ އިސްނެންގެވުމަކަށް، ބާއްވާ ކުއްލި ބައްދަލުވުންތަކެކެވެ.
މި ދެ ބައްދަލުވުމު އިތުރަށް މައްކާގައި ބާއްވާ އިސްލާމީ ގައުމުތަކުގެ އެންމެ އިސްވެރިންގެ 14 ވަނަ ބައްދަލުވުމުގައި ވެސް ޝައިޚް ޢަބްދުﷲ ބައިވެރިވެވަޑައިގަންނަވާނެއެވެ. ދިވެހިރާއްޖޭގެ ރައީސުލް ޖުމްހޫރިއްޔާ އަލްފާޟިލު އިބްރާހީމް މުޙައްމަދު ޞާލިޙުވެސް މިހާރު ވަނީ މި ބައްދަލުވުމުގައި ބައިވެރިވެވަޑައިގަތުމަށް މައްކާއަށް ވަޑައިގެންފައެވެ.
އުދުވާނީ ހަމަލާތައް ކަމުގައި ސައޫދީން ސިފަކޮށްފައި ވަނީ ސައޫދީ ތެޔޮ ހޮޅިއަކަށް ޙޫޘީން ދިން ޑްރޯން ހަމަލާއާއި، ޔޫއޭއީގެ ކަނޑުގެ ސަރަހައްދުގައި ކޮން ބައެއްކަން ނޭނގޭ ބަޔަކު ސައޫދީ ތެޔޮ ޓޭންކަރުތަކަކަށް ދިން ހަމަލާތަކެވެ.
މިއީ ސައޫދީ އަރަބިއްޔާއާއި، ޔުނައިޓެޑް އަރަބް އެމިރޭޓްސް (ޔޫއޭއީ) އާއި، މިސްރާއި، ބަހްރޭން ގުޅިގެން ޤަޠަރު ޙިސާރުކުރިފަހުން އޭގެތެރެއިން ގައުމަކަށް ޤަޠަރުގެ އިސް ވެރިއަކު ވަޑައިގަންނަވާ ފުރަތަމަ ފަހަރެވެ.
ސަލްމާން ރަސްގެފާނު ވަނީ މި ބައްދަލުވުމަށް ވަޑައިގަތުމަށް ޤަޠަރުގެ އަމީރު ޝައިޚް ތަމީމް ބިން ޙަމަދުއަށް ދަޢުވަތު ފޮނުއްވާފައެވެ.
މައްކާގެ ބައްދަލުވުމުގައި ޤަޠަރުގެ އަމީރު ބައިވެރިވަޑައިނުގަންނަވާނެކަން ޔަގީންކޮށްދެއްވަމުން ޤަޠަރުގެ ޚާރިޖީ ވުޒާރާގެ ތަރުޖަމާނު ލުއުލުއާ އަލްޚާޠިރު ވިދާޅުވެފައިވަނީ "މައްކާގައި އޮންނަ އެންމެ އިސްވެރިންގެ ތިންބައްދަލުވުމުގައި ވެސް ޤަޠަރު ތަމްސީލުކުރައްވާނީ ޤަޠަރުގެ ބޮޑުވަޒީރު ޝައިޚް ޢަބްދުﷲ ބިން ނާޞިރު އާލްޘާނީ" ކަމުގައެވެ.
އީރާނާއި އެމެރިކާގެ އަރައިރުން ގަދަވެ، ގަލްފުގެ ގައުމުތަކަށް ކުރިމަތިވެފައިވާ ސަލާމަތީ މައްސަލަތަކާ މެދުވެސް މަޝްވަރާ ކުރުމަށް ހަމަޖެހިފައިވާ މި ބައްދަލުވުމުންތަކުގައި ހިސާރުކުރި ގައުމުތަކުގެ އެންމެ އިސްވެރިންނާއި، ޤަޠަރުގެ ބޮޑުވަޒީރު އެކުގައި ބައިވެރިވަޑައިގަންނަވާނެއެވެ.
2017 ވަނަ އަހަރުގެ ޖޫން މަހު ސައޫދީ އަރަބިއްޔާއާއި، ޔޫއޭއީއާއި، މިސްރާއި، ބަހްރޭން ގުޅިގެން އެއްގަމާއި، ކަނޑާއި، ވައިގެ މަގުން ޤަޠަރު ހިސާރުކުރިއެވެ. އެ ގައުމުތަކުން މި އާދަޔާ ޚިލާފު ފިޔަވަޅު އެޅީ ޤަޠަރުން "ޓެރަރިޒަމަށް" ހިތްވަރުދޭ ކަމަށް ބުނެއެވެ.
ސައޫދީ ރަސްގެފާނު ޤަޠަރުގެ އަމީރަށް ދައުވަތުދެއްވުމަކީ ހިސާރުކުރި ހަތަރު ގައުމުން ޤަޠަރާ މެދު ދެކޭ ގޮތް ބަދަލުވަމުންދާ ކަމުގެ ނިޝާނެއްކަމަށް ބެލެވެއެވެ.
