ޕާކިސްތާނު ޑޮކްޓަރަކު ގިނަ ބައެއްގެ ގަޔަށް ލޭ އަޅަން އެޗްއައިވީ (ހިއުމަން އިމިއުނޯޑެފިޝެންސީ ވައިރަސް) ހުރި ސިރިންޖެއް ބޭނުންކުރުމުގެ ސަބަބުން 90 އަށްވުރެ ގިނަ މީހުންގެ އެ ވައިރަސް އަރައިފިއެވެ. އޭނާގެ ސަބަބުން އެޗްއައިވީ ޖެހުނު މީހުންގެ ތެރޭގައި 65 ކުޑަކުދިން ހިމެނެއެވެ. ޕާކިސްތާނު ފުލުހުން މިހާރު ވަނީ އޭނާ ހައްޔަރުކޮށްފައެވެ.
"އަހަރުމެން އޭނާ ހައްޔަރުކުރީ ސިއްހީ މަސްއޫލުވެރިންގެ ޝަކުވާއަކާ ގުޅިގެން." ފާކިސްތާނުގެ ދެކުނުގެ ރަށެއް ކަމުގައިވާ ލާޅްކާނާގައި މިމައްސަލަ ތަހުގީގުކުރަމުންދާ ފުލުހުންގެ ވެރިޔާ ކާމްރާން ނަވާޒް ވިދާޅުވިއެވެ.
"އަހަރުމެންނަށް އެނގިފައިވާ ގޮތުގައި އެ ޑޮކްޓަރަށްވެސް ވަނީ އެޗްއައިވީ ޖެހިފައި." އޭނާ އިތުރަށް ވިދާޅުވިއެވެ.
ސިއްހީ ދާއިރާގެ މަސްއޫލުވެރިންނަށް މިކަން ފުރަތަމަ ފާހަގަވީ ލާޅްކާނާ ޑިސްޓްރިކްޓްގެ އަވަށެއް ކަމުގައިވާ ރަތޯދޭރޯއިން އޭޑްސް (އެކުއަޔާޑް އިމިއުނޯ ޑެފިޝެންސީ ސިންޑްރޯމް) ބަލި ޖައްސާ އެޗްއައިވީ ހުރި 18 ކުއްޖަކު ފެނުމުންނެވެ. ދެން، އެ ހިސާބުގެ ގިނަ ބަޔަކު އެޗްއައިވީއަށް ޓެސްޓުކުރުމުން އެ ވައިރަސް ހުރި ގިނަ ބަޔަކު ފެނުނީއެވެ. ޑޮކްޓަރުން ވަނީ އެހިސާބުގެ 2400 އަށްވުރެ ގިނަ މީހުން ޓެސްޓުކޮށްފައެވެ.
"90 އަށްވުރެ ގިނަ މީހުން ވަނީ އެޗްއައިވީއަށް ޕޮޒިޓިވް ވެފައި. އަދި ބަލި ޖެހިފައިވާ ކުޑަކުދިންގެ އަދަދު ގާތްގަނޑަކަށް 65 އަށް އަރާ." ލާޅްކާނާގެ ޑިސްޓްރިކްޓް ހެލްތު އޮފިސަރު ޑރ. ޢަބްދުއްރަޙްމާން ވިދާޅުވިއެވެ.
ބަލި ޖެހުނު ހުރިހާ މީހުންނަކީ އެއް ޑޮކްޓަރެއްގެ ކައިރިން ފަރުވާ ހޯދާފައިވާ މީހުންކަން ސިއްހީ އޮފިޝަލުން ވަނީ ހޯދާފައެވެ. އޭނާ އެމީހުންނަށް ފަރުވާދިނުމުގައި ބޭނުންކޮށްފައި ވަނީ ވައިރަސް ހުރި ސިރިންޖެވެ.
ލާޅްކާނާ އޮންނަ ޕްރޮވިންސް، ސިންދުގެ ސިއްހަތާ ބެހޭ ވަޒީރު އަޒްރާ ޕެޗޫހޯ ކަށަވަރުކޮށްދެއްވި ގޮތުގައި އެ ޑޮކްޓަރު މިހާރު ވަނީ ހައްޔަރުކުރެވިފައެވެ. އޭނާ އިތުރަށް ވިދާޅުވި ގޮތުގައި ބަލިޖެހިފައިވާ ކުޑަކުދިންގެ މައިންބަފައިން އެޗްއައިވީއަށް ޓެސްޓުކުރިއިރު އެމީހުންގެ ގައިގާ އެ ވައިރަސް ނެތެވެ.
ހައްޔަރުކުރެވުނު ޑޮކްޓަރަކީ އެ ސަރަހައްދުގެ ސަރުކާރު ހޮސްޕިޓަލުގައި މަސައްކަތްކުރާ ޑޮކްޓަރެވެ. އޭނާވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށްފައެވެ.
1980 ގެ އަހަރުތަކުގެ ތެރޭގައި ދުނިޔޭގައި އޭޑްސް ބަލި ފެތުރެން ފެށިފަހުން 77 މިލިއަން މީހުންށް އެބަލި ޖެހިފައިވާއިރު، އޭގެތެރޭން 35.4 މިލިއަން މީހުން ވަނީ އެބަލީގައި މަރުވެފައެވެ.
ދުނިޔޭގެ ސިއްހަތާ ބެހޭ ޖަމްއިއްޔާ، ޑަބްލިޔުއެޗްއޯއިން ލަފާކުރާ ގޮތުގައި ޕާކިސްތާނުގައި އޭޑްސް ޖެހިފައިވާ 1 ލައްކަ 35 ހާސް މީހުން އެބަތިއްބެވެ. އަދި ފާއިތުވި އަހަރު 6500 މިބަލީގައި އެގައުމުގައި މަރުވެފައި ވެއެވެ.
