ސީރިޔާގެ ދޭރައްޒޫރް ޕްރޮވިންސުގެ ބާޣޫޒް އަވަށުގައި ހުރި އިސްލާމިކް ސްޓޭޓް އިން އިރާގް އެންޑް ސީރިޔާ (އައިސިސް) ފަހު ކޭންޕު ހިފައިން ފުރާތު ކޯރުގެ އައްސޭރީގައި އޮތް ހަނި ސަރަހައްދަކަށް އެޖަމާއަތުގެ ހަނގުރާމަވެރިން ފައްސާލާފައިވާ ކަމަށް ސީރިޔަން ޑިމޮކްރެޓިކް ފޯސަސް (އެސްޑީއެފް) އިން ބުނެފިއެވެ.
އެސްޑީއެފުން އިއްޔެ ބުނި ގޮތުގައި އެޖަމާއަތުގެ ހަނގުރާމަވެރިން މިހާރު ދަނީ އެރަށުގައި އަތްފުނާއަޅައި، އިސްލާމިކް ސްޓޭޓްގެ ހަނގުރާމަވެރިއަކު ނެތްކަން ޔަގީންކުރަމުންނެވެ.
ވައިޓްހައުސްގައި އިއްޔެ ވާހަކަފުޅު ދައްކަވަމުން އެމެރިކާގެ ރައީސު ވިދާޅުވީ އެއް ދުވަހުގެ ތެރޭގައި އިސްލާމިކް ސްޓޭޓް މުޅިން ބަލިކޮށްލެވޭނެ ކަމުގައެވެ. އޭނާ ވިދާޅުވީ އެމެރިކާއިން ދެން ސިރިޔާގައި ބައިތިއްބާނީ ސިފައިންގެ 400 މީހުން ކަމުގައެވެ. އޭގެ 200 މީހުން ބައިތިއްބާނީ ސީރިޔާގައި އުތުރުގައެވެ. އަދި 200 މީހުން ބައިތިއްބާނީ އިސްރާއީލާއި ވީ ފަރާތުގައި، ސީރިޔާގެ ދެކުނުގައެވެ.
ބާޣޫޒުން އިސްލާމިކް ސްޓޭޓް ބޭރުކުރިކަން އެސްޑީއެފުން އިއިލާންކުރިއިރު، މަންޒަރުދުށް މީހުންނާ ހަވާލާދީ އަނަޑޯނޫ އެޖެންސީން ބުނި ގޮތުގައި ރަށުތެރޭގައި މަރުވެފައިވާ އެތައް ސަތޭކަ ބައެއްގެ ހަށިތައް ވަނީ ފުނިޖެހިފައެވެ. އެރަށުގެ މަސްއޫލުވެރިންނާ ހަވާލާދީ އަނަޑޯލޫއިން ބުނި ގޮތުގައި މަރުވެފައިވާ ގިނަމީހުންނަކީ އެރަށް ހިފުމަށް ކުރި ހަނގުރާމައިގައި އެސްޑީއެފްގެ ހަނގުރާމަވެރިންގެ ހަމަލާތަކުގައި މަރުވެފައިވާ އިސްލާމިކް ސްޓޭޓްގެ ހަނގުރާމަވެރިން ކަމުގައި ވިޔަސް، މަރުވެފައިވާ މީހުންގެ ތެރޭގައި އާއްމުވެސް ކޮންމެވެސް ވަރަކަށް ހިމެނެއެވެ.
މަރުވެފައިވާ މީހުންގެ ހަށިތައް ކައިރީގައި ގިނަ އަދަދެއްގެ އަންހެނުންނާއި ކުޑަކުދިން ތިބިތަން، ބާޣޫޒްގެ އާއްމުވެފައިވާ މަންޒަރުތަކުން ފެނެއެވެ. އެކަމާ ގުޅިގެން އެސްޑީއެފުން ބުނީ އެރަށުގައި އާއްމު އެއްވެސް ބަޔަކު މިހާރު ނެތް ކަމަށެވެ. މަރުވެފައިވާ މީހުންގެ ކައިރީގައި ތިބިތަން ފެންނަނީ އިސްލާމިކް ސްޓޭޓްގެ ހަނގުރާމަވެރިންގެ އާއިލާތައް ކަމަށެވެ.
އަލްޤުދްސު އަލްޢަރަބީ ނޫހާއި ވާހަކަ ދައްކަމުން ކާޑިޝް ޑިމޮކްރެޓިކް ޕާޓީގެ އިސް މެންބަރަކު ކަމުގައިވާ މުޙައްމަދު ޙަބީބު ބުނީ މަރުވެފައި ވަނީ އަމާންދޭން ދެކޮޅުހެދި ހަނގުރާމަވެރިން ކަމުގައެވެ.
އަނެއްކޮޅުން، ސީރިޔަން އޮބްޒަވޭޓަރީ ފޯ ހިއުމަން ރައިޓްސްއިން އިއްޔެ ބުނި ގޮތުގައި އެމެރިކާ އިސްވެ އޮވެ ހަނގުރާމަކުރާ ކޯލިޝަނުން 2014 އިން ފެށިގެން ސީރިޔާގައި ކުރި ހަނގުރާމައިގައި އެގައުމުގެ އާއްމުންގެ 3035 މީހުން މަރުވެފައި ވެއެވެ. އޭގެ ތެރޭގައި 924 ކުޑަކުދިންނާއި، 656 ކުޑަކުދިން ހިމެނެއެވެ.
