މާފަންނު އިހުސާން ފިހާރަ ކައިރީ ހުރި ސައިކަލުތަކެއްގައި ރޭ ފަތިހު ރޯކޮށްލައިފިއެވެ.
ފުލުހުން ވިދާޅުވީ މި ޙާދިސާގައި 7 ސައިކަލެއް ވަނީ ބޭނުން ނުކުރެވޭ ވަރަށް އަނދައިފައި ކަމަށެވެ. އަދި އިތުރު ދެ ސައިކަލަކަށް ވަނީ އެކިވަރުގެ ގެއްލުން ވެފައި ކަމަށް ވެސް ފުލުހުން ވިދާޅުވިއެވެ. އޭގެ އިތުރަށް އަލިފާނުގެ ހާދިސާ ހިނގި ސަރަޙައްދުގައި ހުރި މ.ސަބުދެލި ގޭގެ ގުރައުންޑް ފްލޯގައި ހަދާފައިވާ ގަރާޖުތެރޭގައި އަޅާފައިވާ ހޮޅިތަކެއްގައި އަލިފާން ރޯވެ ގެއްލުންތަކެއް ވަނީ ވެފައެވެ. މިޙާދިސާގައި މީހަކަށް އެއްވެސް ގެއްލުމެއް ވެފައެއް ނުވެއެވެ.
މި ޙާދިސާގެ މަޢުލޫމާތު ސިފައިންނަށް ލިބިފައިވަނީ ރޭ މެންދަމުން އަލި 3:46 ގައެވެ. މަޢުލޫމާތު ލިބުމާއެކު އެމްއެންޑީއެފްގެ ފަޔަރ އެންޑް ރެސްކިއު ސަރވިސްއިން ވަނީ އެ ސަރަޙައްދަށް ގޮސް އަލިފާން ނިއްވައިފައެވެ. އަލިފާން ނިއްވާފައިވަނީ 3:55 ގައެވެ.
ފުލުހުން ގެންދަނީ މިޙާދިސާ ތަޙުގީގު ކުރައްވަމުންނެވެ. މިހާތަނަށް އެއްވެސް މީހަކު ބަންދު ކޮށްފައެއް ނުވެއެވެ.
