ފުރަތަމަ ޑިގްރީއަށް ހިލޭ ކިޔަވައިދިނުމުގެ ފުރުސަތު މާދަމާ ހުޅުވާލާނެ ކަމަށް ހަޔަރ އެޑިޔުކޭޝަން މިނިސްޓްރީން ވިދާޅުވެއްޖެއެވެ. އެމިނިސްޓްރީން ވިދާޅުވީ ފުރަތަމަ ޑިގްރީއަށް ހިލޭކިޔައިވައިދިނުމުގެ ފުރުސަތު ހުޅުވާލުން އިފްތިތާހު ކުރެއްވުން އޮންނާނީ މާދަމާ ހެނދުނު 10:30 ޤައުމީ ޔުނިވަރުސިޓީގެ މައި އޮޑިޓޯރިއަމްގައި ކަމަށެވެ.
މިފުރުސަތު ހުޅުވާލުން އިފްތިތާހުކޮށް ދެއްވާނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެވެ. މިއީ މިސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމަނުއްވައިގެން ކުރިއަށް ގެންދަވާ ކަމެކެވެ.
މިކަމާ ބެހޭ އިތުރު މަޢުލޫމާތު ދެއްވުމަށް މިނިސްޓަރ އޮފް ހަޔަރ އެޑިޔުކޭޝަން ޑޮކްޓަރ އިބްރާހީމް ޙަސަން ނޫސްވެރިންނާ މާދަމާ ބައްދަލުކުރައްވާނެއެވެ. އެމަނިކުފާނު ނޫސްވެރިންނާ ބައްދަލު ކުރައްވާނީ މާދަމާ ހެނދުނު 11:30ގައި،ޤައުމީ ޔުނިވަރސިޓީގެ ކޮންފަރެންސް ހޯލުގައެވެ.
