ނެދަރލޭންޑްސްގެ ކަނާތުފިޔައިގެ ހަރުކަށި ސިޔާސީ ލީޑަރު އަދި އިސްލާމްދީނަށް ފުރައްސާރަކުރުމަށް މަޝްހޫރު ގިއަރްޓް ވިލްޑާސްގެ އެންމެ އަރިސް މީހުންގެ ތެރޭގައި ހިމެނޭ ޖާރޯމް ވާން ކްލެވަރެން އިސްލާމްދީން ގަބޫލުކޮށް އެކަން އިއުލާންކޮށްފިއެވެ. އޭނާ އަކީ 2010 އިން 2017 އަށް ނެދަލޭންޑްސްގެ ގާނޫނު ހަދާ މަޖިލީހުގައި ގިއަރްޓް ވިލްޑާސްގެ ޕާޓީ، ޕާޓީ ފޯ ފްރީޑަމް (ޕީވީވީ) ތަފްސީލުކޮށްފައިވާ މެންބަރެކެވެ.
އެ ހަތް އަހަރު އޭނާ ވަނީ ވަރުބަލިކަމެއް ނެތި ގާނޫނުހަދާ މަޖިލީހުގައި އިސްލާމްދީނާ ދެކޮޅަށް އަޑުއުފުލާފައެވެ. "އަހުރުމެން އިސްލާމްދީން އެއްވެސް ވަރަކަށް ބޭނުމެއް ނޫނޭ" " :"އިސްލާމްދީނަކީ އަހަރުމެންގެ ގައުމަށް ފާއިތުވި 100 އަހަރު ދިމާވި އެންމެ ބަލިމަޑުކަމޭ" ބުނެ އޭރު އޭނާ ވަނީ ބުރުގާ އެޅުން މަނާކުރުމަށާއި، ނެދަލޭންޑްސްގެ މިސްކިތްތަކުން މުންނާރުތައް ނެގުމަށް ގޮވައިލާފައެވެ.
އުމުރުން 40 އަހަރުގެ ވާން ކްލެވަރެން ބުނީ އިސްލާމްދީނާ މެދު އޭނާގެ ޚިޔާލު ބަދަލުވީ ދީނާ ފާޑުކިޔައި ދީނާ ދެކޮޅަށް އޭނާ ލިޔަން ފެށި ފޮތެއްގެ މަސައްކަތުގެ މެދުތެރެއިންނެވެ. އޭނާ ބުނި ގޮތުގައި ފޮތް ލިޔަމުން ދިޔަވަރަކަށް އޭނާއަށް ވިސްނެންފެށީ، އިސްލާމްދިނާ ދެކޮޅުވުމަށްވުރެ، އެދީނާ އެއްކޮޅުވާން ޖެހޭ ކަންތައްތައް މާގިނަ ކަމުގައެވެ. އޭނާ އިސްލާމްދީނާ ދެކޮޅަށް ލިޔަން ފެށި ފޮތް ދޫކޮށްލައި، އޭނާ މިހާރު ނިންމާފައިވަނީ އިސްލާމްދީނަށް ފާޑުކިޔާ މީހުންނަށް ރައްދުދީފައި ފޮތެއް ލިޔާށެވެ.
"ފާއިތުވި އަހަރުތަކުގައި އަހަރެން ހުރީ ވަރަށް ބޮޑަށް އިސްލާމްދީނާ ދެކޮޅަށް. އެކަމަކު ތިމާ ހުރީ ނުބައިކޮށްކަން ކަނޑައަޅަން ޖެހޭ ވަގުތަކީ މަޖާ ވަގުތެއް ނޫން." އޭނާ ބުނެފައި ވެއެވެ.
"އެހެނަސް ކަލާނގެ ހޯދުމުގެ މަސައްކަތުގައި އަހަރެން އަބަދުވެސް ހުރީ ނުތަނަވަސްކަމެއްގެ ތެރޭގައި. މިހާރު އެ ނުތަނަވަސްކަން މަޑުމަޑުން ފިލައިގެން ގޮސްފި. އަހަރެންނަށް އިހުސާސްކުރެވެނީ ދީނީ ގޮތުން އަހަރެންގެ މަންޒިލަށް އާދެވިއްޖެ ކަމުގައި." ނެދަލޭންޑްސްގެ މަޝްހޫރު ދުވަހު ނޫސް އެންއާރްސީ ހެންޑަލްސްބްލާޑްއާ އިއްޔެ ވާހަކަދައްކަމުން ވާން ކްލެވަރެން ބުނެފައި ވެއެވެ.
ވާން ކްލެވަރެން ބުނީ އޭނާ އިސްލާމްވުމާ އޭނާގެ އަންހެނުން ދެކޮޅު ނަހަދާ ކަމަށެވެ. އަދި އޭނާގެ އަންހެނުންނާއި ދެ ދަރިން އިސްލާމްވާން އޭނާ މަޖުބޫރުނުކުރާނެ ކަމުގައެވެ.
އޭނާ އިސްލާމްވުމާ ގުޅިގެން ރުޅިއައިސްފައި ހުރި އޭނާގެ ކުރީގެ އެންމެ ގާތް އެކުވެރިޔާ ގިއަރްޓް ވިލްޑާސް ބުނީ މިހާރު ވާން ކެލެވަރެން އަކީ "ޖަނަވާރު ކަތިލާ ތަނެއްގައި މަސައްކަތްކުރާ ވެޖިޓޭރިއަނެއް" ކަމުގައެވެ.
