އީރާނުގެ އިސްލާމީ އިންގިލާބަށް 40 އަހަރު ފުރުމާ ދިމާކޮށް އެގައުމުން 1350 ކިލޯމީޓަރުގެ ރާސްތާއަށް ދަތުރުކުރުމުގެ ގާބިލުކަން ލިބިފައިވާ އާ މިސައިލެއް ދައްކާލައިފިއެވެ.
"ހޮވެއިޒާ ކްރޫޒް މިސައިލް ވަނީ 1200 ކިލޯމީޓަރުގެ ރާސްތާއަށް ކާމިޔާބުކަމާއެކު ތަޖުރިބާކުރެވި، ސީދާ އަމާޒަށް ވާސިލުވެފައި." މިސައިލްގެ ފުރަތަމަ ތަޖުރިބާގެ ވީޑިއޯއާއެކު އީރާނުގެ ރަސްމީ ޓީވީގައި ވާހަކަފުޅުދައްކަވަމުން ދިފާއީ ވަޒީރު އަމީރު ހާތަމީ ވިދާޅުވިއެވެ. އަދި ދިފާއީ ވަޒީރު ބައިވެރިވެވަޑައިގެންނެވި ރަސްމިއްޔާތެއްގައި އެ މިސައިލު ވަނީ އާއްމުންނަށް ދައްކާލާފައެވެ.
ހާތަމީ ވިދާޅުވި ގޮތުގައި ހޮވެއިޒާގެ ނަންދެވިފައިވާ މިސައިލް އުފައްދާފައިވަނީ އީރާނުގެ އަމިއްލަ ވަސީލަތްތައް ބޭނުންކޮށްގެންނެވެ.
އެމެރިކާގެދެކޮޅުހެދުންތަކާ، ޔޫރަޕްގެ ގައުމުތަކުގެ ކަންބޮޑުވުންތަކާއެކުވެސް އީރާނުން ވަނީ އެގައުމުގެ މިސައިލް ޕްރޮގްރާމް، އަދި ވަކިން ޚާއްސަކޮށް ބެލިސްޓިކް މިސައިލް ޕްރޮގްރާމް ކުރިއަށް ގެންގޮސްފައެވެ. އީރާނުން ބުނާގޮތުގައި، އެގައުމުގެ މިސައިލް ޕްރޮގްރާމަކީ ދިފާއީ ޕްރޮގްރާމެކެވެ. އިސްވެ ހަމަލާދިނުމަށް ހިންގޭ ޕްރޮގްރާމެއް ނޫނެވެ.
"މިމިސައިލް އުދުއްސާލަން ތައްޔާރުވާން ނަގަނީ ވަރަށް ކުޑަ ވަގުތުކޮޅެއް. އަދި އެއަށް ތިރިން ދަތުރުކުރުމުގެ ގާބިލުކަން ލިބިފައިވޭ." މިސައިލް ދައްކާލަން ބޭއްވި ރަސްމިއްޔާތުގައި ހާތަމީ ވިދާޅުވިއެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އީރާނުގެ ރިވޮލިއުޝަނަރީ ގާޑްސްގެ އެއަރޯސްޕޭސް ޑިވިޝަންގެ ވެރިޔާ އަމީރަލީ ހާޖީޒާދޭ ވިދާޅުވީ، ކުރޫޒް މިސައިލަށް ބޭނުންވާ ޖެޓް އިންޖީން އުފެއްދުމުގައި އީރާނަށް ކުރިމަތިވި ހުރަސްތައް މިހާރު ގިރާކުރެވިފައިވާ ކަމަށާއި، ކޮންމެ ރާސްތާއެއްގެ މިސައިލެއް އުފެއްދުމުގެ ގާބިލުކަންވެސް މިހާރު އީރާނަށް ލިބިފައިވާ ކަމަށެވެ. އެހެންނަމަވެސް، ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އެޑްމިރަލް އަލީ ޝަމްޚާނީ ވިދާޅުވެފައިވާ "މިސައިލްގެ ރާސްތާ ދިގުކުރުމުގެ ނިޔަތެއް" އަދި ނެތްކަމުގައެވެ.
ފާއިތުވި ޖަނަވަރީ މަހު އަމިއްލަ ރޮކެޓެއް ބޭނުންކޮށްގެން ޖައްވަށް ސެޓެލައިޓެއް ފޮނުވަން އީރާނުން ކުރި މަސައްކަތް ވަނީ ނާކާމިޔާބުވެފައެވެ. އެފަހަރުވެސް، އެކަން ކުރީވެސް އެމެރިކާއިން އެކަން ނުކުރުމަށް އިންޒާރުދީފައި ވަނިކޮށެވެ.
