އާއްމުކޮށް އަހަރެއްގެ ތެރޭގައި ވެހޭ މިންވަރަށް ފާއިތުވި ހަފުތާއެއްހާ ދުވަހުގެ ތެރޭގައި ވާރޭ ވެހުމުގެ ސަބަބުން އޮސްޓްރޭލިޔާގެ ކުއީންސްލޭންޑް ސްޓޭޓުގެ އުތުރުގައި އާދަޔާއި ޚިލާފަށް ފެންބޮޑުވެއްޖެއެވެ. ފާއިތުވި ސަތޭކަވަރަކަށް އަހަރުގެ ތެރޭގައިވެސް މި ވަރަށް ފެންބޮޑުވެފައި ނުވެއެވެ.
ފުލުހުންނާއި، ސަފައިންނާއި، އެމަޖެންސީ ޚިދުމަތްތަކުގެ މުވައްޒަފުން ދަނީ އެންމެ ބޮޑަށް ފެނުގެ އަސަރުކުރި އަވަށްކަމުގައިވާ ޓައުންސްވިލްގެ ގެތަކަށް ގޮސް ރޭގަނޑު އަނދިރިވުމުގެ ކުރިން ގެތައް ދޫކޮށް ދިއުމަށް އަންގަމުންނެވެ. އަދި އިތުރަށް ވާރޭ ވެހޭނެކަމަށް ލަފާކުރެވޭތީއެވެ.
"ހުޅުވިފައި ހުރި ދޮރު ވަރަށް ވަރަށް ވަރަށް އަވަހަށް ބަންދުވާނެ" ނޫސްވެރިންނަށް މައުލޫމާތުދެއްވަމުން ޗީފް ސުޕްރިންޓެންޑެންޓް ސްޓީވް މުންރޯ ވިދާޅުއެވެ. އެބަހީ، ވާރޭ އިތުރަށް ވެހެން ފެށުމުގެ ކުރިން ރައްކާތެރި ސަރަހައްދަކަށް ދާން އޮތް ވަގުތު ދަނީ ހަނިވަމުންނެވެ.
80 ހާސް މީހުން ދިރިއުޅޭ އެރަށުގެ 500 ގެއަށް މިހާރު ވަނީ ފެން ވަދެފައެވެ. ލަފާކުރެވޭ ގޮތުގައި މިރޭ ވާރޭ ވެހިއްޖެނަމަ އިތުރު 500 ގެއަށް ފެން ވަންނާނެއެވެ.
މިރެއާއި މާދަމާވެސް ވާރެ ނުހުއްޓައި ވެހިއްޖެނަމަ ކުއީންސްލޭންޑުގެ އުތުރުގެ ސަރަހައްދުގެ 10 ހާހާ 20 ހާހާ ދެމެދުގެ އަދަދެއްގެ ގެއަށް ފެން ވަނުމުގެ ފުރުސަތު އެބައޮތްކަމަށް ކަމާބެހޭ ފަރާތްތަކުން ލަފާކުރެއެވެ. ކުއީންސްލޭންޑް އައްސޭރި ފަށުގެ ކެއާންސްއިން މެކޭއާ ދެމެދުގައިވާ 700 ކިލޯމީޓާރުގެ ސަރަހައްދު މިހާރުވަނީ ކާރިސާ ސަރަހައްދެއް ކަމުގައި ކަނޑައަޅާފައެވެ.
އެ ސްޓޭޓްގެ ޕްރެމިއާ އަނަސްޓާޝީޔަ ޕަލަޒުކް ވިދާޅުވީ ކުރިއަށް އޮތް 24 ނުވަތަ 48 ގަޑިއިރަކީ ވަރަށް ނާޒުކު ވަގުތެއް ކަމުގައެވެ.
ފެންބޮޑުވެފައިވާ ކުއީންސްލޭންޑްގެ އުތުރު ސަރަހައްދަކީ ތިމަރައާއި، ރިއްސާއި، ރަނާއި، ލޮޔާއި، ދަގަނޑު ފަދަ ގިނަ މައުދަންތަކެއް ނަގާ ސަރަހައްދެކެވެ. އަދި ފެންބޮޑުވުމުގެ އަސަރު އެންމެ ބޮޑަށް ކޮށްފައިވާ ޓައުންސްވިލްއަކީ މައުދަން ޕްރޮސެސްކުރާ މަރުކަޒެކެވެ.
ކުއީންސްލޭންޑުގައި ފެންބޮޑުވެގެން އުޅޭއިރު، އޮސްޓްރޭލިޔާގެ ދެކުނުގެ ސްޓޭޓޭއް ކަމުގައިވާ ޓެސްމޭނިޔާގެ ޖަންގަލީގައި އަލިފާން ރޯވެ 1 ލައްކަ 80 ހާސް އޭކަރު ވަނީ އަނދައިގެން ގޮސްފައެވެ.
