ސިއްރު ފެންފުށި ރިސޯޓުގައި މަސައްކަތް ކުރައްމުންދިޔަ މީހަކު ޢިމާރާތަކުން ވެއްޓެ މީހަކު މަރުވެއްޖެއެވެ.
ފުލުހުން ވިދާޅުވެފައިވަނީ އެ ޙާދިސާގައި މަރުވެފައިވަނީ ޢުމުރުން 22 އަހަރުގެ ދިވެއްސެއް ކަމަށެވެ. ފުލުހުން ވިދާޅުވެފައިވަނީ އޭނާ ޢިމާރާތުން ވެއްޓުމުން ވަނީ ކުޅުދުއްފުށީ ރީޖަނަލް ހޮސްޕިޓަލަށް ގެންގޮސް ފަރުވާދޭން ފަށައިފައި ކަމަށެވެ. އޭނާ މަރުވީ އެ ހޮސްޕިޓަލުގައި ފަރުވާ ދެމުން ދަނިކޮށްނެވެ.
މި މީހާއާ ބެހޭ އިތުރު މަޢުލޫމާތެއް ފުލުހުން ވެސް ހާމައެއް ނުކުރެއެވެ. އަދި ހޮސްޕިޓަލުން ވެސް އޭނާއާ ބެހޭ މަޢުލުމާތެއް ލިބޭގޮތެއް ނުވިއެވެ. ފުލުހުން މިހާރު ގެންދަނީ އެކަން ހިނގިގޮތް ބަލަމުންނެވެ. މި ޙާދިސާގެ ރިޕޯޓު ފުލުހުންނަށް ލިބިފައިވަނީ މިއަދު ހެނދުނު 11:30 ގައެވެ.
