އެލައިޑު އިންޝުއަރެންސް ކޮމްޕެނީ ގެ މެނޭޖިންޑިރެކްޓަރަކަށް ޝަފާޒު މުޙައްމަދު މިއަދު އައްޔަން ކުރައްވައިފިއެވެ. އެސްޓީއޯގެ ސަބްސިޑަރީ ކުންފުނީގެ އެމްޑީއަކަށް އޭނާ ހަމަޖެއްސެވީ އެސްޓީއޯ ބޯޑުންނެވެ.
ޝަފާޒު އެމަޤާމަށް ހަމަޖެއްސެވީ ކުރިން އެ މަޤާމުގައި ހުންނެވި އަޙުމަދު ޢަމީލް އިސްތިއުފާ ދެއްވުމުންނެވެ. ޝަފާޒަކީ އެކުންފުނީގައި 24 އަހަރަށްވުރެ ގިނަދުވަހު ޚިދުމަތް ކުރައްވައިފައވާ ބޭފުޅެކެވެ. މެނޭޖިން ޑިރެކްޓަރަކަށް ހަމަޖެއްސެވުމުގެ ކުރިން އޭނާ ހުންނެވީ އެކުންފުނީގެ ޑެޕިޔުޓީ މެނޭޖިން ޑިރެކްޓަރަކަށެވެ.
އެލައިޑަކީ ރާއްޖޭގައި ހިންގާ އިންޝުއަރެންސް ކުންފުނިތަކުގެ ތެރެއިން އެންމެ ބޮޑު އެއްކުންފުންޏެވެ. އެކުންފުނި ހިންގާތާ މިއަދަށް 34 އަހަރުވަނީ ވެފައެވެ. ފާއިތުވި ފަސް އަހަރު އެކުންފުނިންވަނީ ވިޔަފާރީގައި ބޮޑު ކުރިއެރުންތަކެއް ޙާސިލް ކުރައްވައިފިއެވެ.
