ޕީޕަލް ނެޝަނަލް ކޮންގްރެސް (ޕީއެންސީ) އުފެއްދުމަށްޓަކައި ބާއްވަން ޖެހޭ ޤާނޫނީ ޖަލްސާ ބޭއްވުމުގެ ހުއްދަ އިލެކްޝަން ކޮމިޝަން (އީސީ)އިން ދެއްވައިފިއެވެ.
މި ޖަލްސާގައި ޕާޓީގެ ކުލައާއި، ޢަސާސީ ޤަވާޢިދާއި ލޯގޯ ފާސްކުރައްވާނެ ކަމަށް މަޢުލޫމާތު ވަނީ ލިބިފައެވެ. މިޖަލްސާ ބޭއްވުމުގެ ހުއްދަ ދެއްވިޔަސް ބާއްވާނެ ތާރީޚަކާއި ތަނެއް އަދި ޕީއެންސީއަކުން ހާމައެއް ނުކުރެއެވެ. ޖަލްސާ ބޭއްވުމުގެ ހުއްދަ މިދެއްވީ ޕީއެންސީން ހުށަހެޅި 3000 ފޯމުގެ ތެރޭގައި މައްސަލަތައް ހުރި ފޯމު ހުރުމުން އެކަންކަން އިސްލާޙު ކުރެއްވުމަށްފަހު ގައެވެ. އެޕާޓީ އުފެއްދުމުގެ ހުއްދަ ނުދީ އިލެކްޝަންސް ކޮމިޝަނުން ހިފަހައްޓަވަމުން ގެންދެވީ ގަސްތުގައި ކަމަށް އެޕާޓީ އުފެއްދުމަށް އިސްކޮށް އުޅުއްވާ ބޭފުޅުންވަނީ ތުހުމަތު ކުރައްވައިފައެވެ.
މި މައްސަލާގައި ޕީޕީއެމްގެ ޕީޖީގެ ބައެއް ބޭފުޅުންވަނީ ރައްޔިތުންގެމަޖިލީހުގެ ރައީސް ޤާސިމް އިބްރާހީމާ ބައްދަލު ކުރައްވައި ވާހަކަވެސް ދައްކަވައިފައެވެ. އެކަމާ ގުޅިގެން ޤާސިމް ވިދާޅުވެފައިވަނީ އިލެކްޝަންސް ކޮމިޝަން ޖަވާބުދާރީ ކުރުވާނެ ކަމަށެވެ.
ޕީއެންސީއަކީ ރައީސް ޢަބްދުﷲ ޔާމީން އިސްވެ ހުންނަވައި އުފަދަވާ ޕާޓީއެކެވެ. އެކަމުގައި އެންމެ ޙަރަކާތްތެރިވެ ވަޑައިގަންނަވާ އެއް ބޭފުޅަކީ ފޮނަދޫ ދާއިރާގެ މެމްބަރު ޢަބްދުއްރަޙީމް ޢަބްދުﷲ އެވެ.
