ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވަފުދެއް ސިއްރު ދަތުރެއްގައި އިސްރާއީލަށް ހިނގައްޖެކަމަށް އިސްރާއީލުގެ ބައެއް ނޫސްތަކުން ޚަބަރުދީފިއެވެ.
އިސްރާއީލުގެ މަޝްހޫރު ނޫހެއް ކަމުގައިވާ ޔެދިއޮތު އަހްރޮނޯތުގެ ވައިގެ ދަތުރުފަތުރުތަކާ ބެހޭ ރިޕޯޓަރު އީތާއީ ބްލޫމެންޓަލް ލިޔެފައިވާ ގޮތުގައި ޔޫއޭއީގެ ޕްރައިވެޓް ޖެޓެއް ވަނީ ފާއިތުވި ބުދަދުވަހު އަބޫދާބީން ފުރައިގެން ސީދާ ޓެލްއަވީއަށް ގޮސްފައެވެ. އޭނާ ބުނާގޮތުގައި އެ ބޯޓުން ދަތުރުކުރެއްވީ ޔޫއޭއީ ސަރުކާރުގެ އިސްވެރިންތަކެކެވެ.
އެ ބޯޓު ދަތުރުކުރި ގޮތް ފްލައިޓްރާޑާ24.ކޮމް އިން ނަގާފައި އެނޫހުގައި ޝާއިއުކޮށްފައި ވެއެވެ. އެ ޗާޓުން އެނގޭ ގޮތުގައި އެ ބޯޓު ދަތުރުކޮށްފައިވަނީ ސައޫދީ އަރަބިއްޔާ މަތިންގޮސް ޖޯޑަން ސަރަހައްދަށް ނުވަދެ، ގަލްފް އޮފް އަގަބާއާއި ދިމާއަށް އިސްރާއީލުގެ ސަރަހައްދަށް ވަދެގެންގޮސް ޓެލްއަވީވަށެވެ.
އަނެއްކޮޅުން އިސްރާއީލުގެ ނޫސްވެރިޔާ އެޑީ ކޯހެން ކޮށްފައިވާ ޓުވީޓެއްގައި ވާގޮތުން "ޔޫއޭއީގެ ޚާރިޖީ ވަޒީރު ޝޭޚް ޢަބްދުﷲ ބިން ޒާޔިދް އާލްނަހްޔާނާއި، ޔޫއޭއީގެ ޖާސޫސީ އިދާރާގެ ވެރިޔާ ޝޭޚް ޠަޙްނޫން ބިން ޒާޔިދް އާލްނަހްޔާން ޓެލްއަވީވްގެ ހަރްޓަޒަލިޔާގައި ހުންނަ ރިޒް ކާލްޓަން ހޮޓަލުގައި އެބަތިއްބެވިއެވެ." އަދި އެ ދެ ބޭފުޅުން އެ ހޮޓަލުގެ ކައިރީގައި ހުންނަ އަރީނާ މޯލްގައި ބާޒާކުރައްވަން އުޅުއްވާ ތަން ފެނިފައި ވެއެވެ.
"މިހާރު ސިއްރު ދަތުރުތަކެއް ނުކުރެވޭނެ. އަހަރެން ވާނީ ކުރިންވެސް މިވާހަކަ ބުނެފައި." އޭނާ އަރަބިބަހުން ކުރި ޓުވީޓު ނިންމާލަމުން ބުނެފައި ވެއެވެ.
އިސްރާއީލުން ފަލަޞްޠީނުގެ ބިންތައް ނުހައްގުން ފޭރިގަނެ، އަނިޔާވެރިވަމުން ދާއިރުވެސް، އަދި އިސްރާއީލުގެ އުދުވާނީ ސިޔާސަތަށް ބަދަލެއް އައިސްފައި ނުވާއިރުވެސް، ފަހަކަށް އައިސް ބައެއް އަރަބި ގައުމުތަކުގެ އިސްވެރިންނާއި، އިސްރާއީލުގެ ވެރިން ބައްދަލުކުރުން އިތުރުވަމުން ދާކަން ފާހަގަކޮށްލަން ޖެހެއެވެ.
އެގޮތުން އިސްރާއީލުގެ ލޭބާ ޕާޓީގެ ރައީސު އަވީ ގަބޭ ވަނީ ފާއިތުވި ޑިސެންބަރު މަހު ޔޫއޭއިއަށް ދަތުރެއްކޮށްފައެވެ. އެދަތުރުގައި އޭނާ ވަނީ ޔޫއޭއީގެ ވަޒީރުން ފެންވަރުގެ ތިން ބޭފުޅުންނާ އަބޫދާބީގައި ބައްދަލުކޮށްފައެވެ. ފާއިތުވި އަހަރުގެ އޮކްޓޯބަރު މަހުގެ ތެރޭގައި އިސްރާއީލުގެ މުވާސަތާލާ ބެހޭ ވަޒީރު އަޔޫބު ކަރާއާއި، ކުޅިވަރާއި ސަގާފަތާއި ބެހޭ ވަޒީރު މިރީ ރެގެވް ވެސް ޔޫއޭއީއަށް ޒިޔާރަތް ކޮށްފައި ވެއެވެ.
ފާއިތުވި އަހަރު ނޮވެންބަރު މަހުގެ ތެރޭގައި އޮމާނުގެ ރަސްގެފާނުގެ ދައުތަކަށް އެ ގައުމަށް ގޮސް، އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ރަސްގެފާނު ޤާބުސް ބިން ސައީދާ ބައްދަލުކޮށްފައިވާކަންވެސް ފާހަގަކޮށްލަން ޖެހެއެވެ.
