ދިވެހި ޅެންވެރިން ޅެންވެރިންގެ އުފެއްދުންތަކާއި އަދަބީ ފަންނުތައް ބައިނަލްއަޤުވާމީ ދުނިޔެއަށް ހާމަކަން ބޮޑުގޮތެއްގައި ދެއްކޭނެ ގޮތްތައް ފަހިކޮށް ދެއްވުމަށް ކަމާބެހޭ ފަރާތްތަކަށް، މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫން މިއަދު ގޮވައިލައްވައިފިއެވެ.
އެކަމަނާ މިކަމަށް ގޮވައިލެއްވީ މިއަދު ފާހަގަކުރަމުންދާ ރާއްޖޭގެ 30 ވަނަ ޅެންވެރިންގެ ދުވަހުގެ މުނާސަބަތުގައި ދެއްވި ޚިތާބުގައެވެ. "ޅެންވެރިންގެ އުފެއްދުންތަކާއި ދިވެހި އަދަބީ ފަންނުތައް ބައިނަލްއަގުވާމީ ދުނިޔެއަށް މިހާރަށްވުރެ ހާމަކަންބޮޑު ގޮތެއްގައި ދެއްކޭނެ ގޮތްތައް ކަމާބެހޭ އެންމެހާ ފަރާތްތަކުން ފަހިކޮށްދެއްވާން އަޅުގަނޑު ގޮވާލަން،" މިނިސްޓަރ ވިދާޅުވިއެވެ.
މީގެ އިތުރަށް މިނިސްޓަރ ޔުމްނާ ވަނީ ދިވެހި ޅެންވެރިކަން ކުރިއަރުވައި ތަރައްޤީ ކުރައްވާން ކަމާބެހޭ ފަރާތްތަކުން ކުރައްވާ މަސައްކަތްޕުޅުތައް މިހާރަށްވުރެ ފުޅާ ކުރެއްވުމަށް ވެސް ގޮވައިލައްވައިފައެވެ.
ޅެންވެރިކަމަކީ ކޮންމެ އަދަބިއްޔާތެއްގައިވެސް އެކުލެވޭ އެންމެ ފަށުވި ފަންނު ކަމަށާއި، އެފަންނު ދިރުވައި އާލާކޮށް ދެމެހެއްޓުމަކީ އަދަބިއްޔާތުގެ އަހުލުވެރިންގެ ވަރަށްބޮޑު ޒިންމާއެއް ކަމަށް ވެސް މިނިސްޓަރވިދާޅުވިއެވެ.
ޅެންވެރިންގެ ދުވަސް ނިސްބަތްވަނީ ޝާޢިރުއް ޝަބާބު އަލްމަރުޙޫމް އަލްއުސްތާޛު އިބްރާހީމް ޝިހާބަށެވެ. މިއަހަރުގެ ޅެންވެރިންގެ ދުވަސް ޚާއްސަކުރައްވައިފައިވަނީ މަޝްހޫރު ޅެންވެރިޔާ އަލްމްރުޙޫމް ޔޫސުފް މުޙައްމަދު ފުޅު (އެދުރުބެ) އަށެވެ. ޅެންވެރިންގެ ދުވަހުގެ ޙަރަކާތްތައް ވެސް ކުރިއަށްދާނީ ޔޫސުފު މުޙައްމަދުފުޅުގެ އުފަން ރަށް ކަމަށްވާ ރ. އިނގުރައިދޫގައެވެ.
