ޤަޠަރުގައި އެމެރިކާ ސިފައިން ތިބޭ އަލްއުދައިދު އަސްކަރީ ވައިގެ މަރުކަޒު ބޮޑުކޮށް ތަރައްގީކުރުމަށް ޤަޠަރާއެކެ މެމޮރެންޑަމް އޮފް އަންޑަސްޓޭންޑިންގ (އެމްއޯޔޫ) އެއްގައި ސޮއިކޮށްފައިވާކަން އެމެރިކާގެ ޚާރިޖީ ވަޒީރު މައިކް ޕޮމްޕެއޯ ހާމަކުރައްވައިފިއެވެ.
އަލްޢުދައިދަކީ މެދުއިރުމަތީގައި އޮންނަ އެމެރިކާގެ އެންމެ ބޮޑު އަސްކަރީ މަރުކަޒެވެ. އަދި އެމެރިކާ ސިފައިންގެ ސެންޓްރަލްކޮމާންޑުގެ މައިމަރުކަޒެވެ. އެ މަރުކަޒުގައި އެމެރިކާގެ 13 ހާސް ސިފައިން ތިބޭއިރު، ހަނގުރާމަތީ 100 ވަރަކަށް މަތިންދާބޯޓު އޮވެއެވެ.
ސޮއިކުރެވުނު އެމްއޯޔޫގެ ދަށުން ވައިގެ މަރުކަޒު ބޮޑު ކުރުމަށް ހިނގާ ހުރިހާ ކެޕިޓަލް ޚަރަދެއް ދޭނީ ޤަޠަރުންނެވެ.
"ދެފަރާތް ގުޅިގެން އިތުރަށް މަސައްކަތްކުރުމާއި، އަލްއުދައިދު ވައިގެ މަރުކަޒު ފުޅާކުރުން ހިމެނޭ އެއްބަސްވުމެއްގައި އެމެރިކާއާއި ޤަޠަރުން ވަނީ ސޮއިކޮށްފައެވެ. ކެޕިޓަލް ޚަރަދު ދޭން ޤަޠަރުން ހުށަހެޅުމަކީ އެމެރިކާ ސިފައިން ގިނަ ދުވަހަށް ތިބުމުގެ ފުރަސަތު އިތުރުވެގެންދާނެ ކަމެކެވެ." ޤަޠަރާއި އެމެރިކާގެ ވާހަކަތަކަށް ފަހު ނެރުނު ގުޅިފައިވާ ބަޔާނެއްގައި ވެއެވެ.
އެ ބަޔާނުގައި އެމެރިކާއިން ވަނީ ވައިގެ މަރުކަޒު ބޮޑުކޮށް ތަރައްޤީކުރުމަށް ޤަޠަރުން ހުށަހެޅި 'ދީލަތި ހުށަހެޅުމަށް' މަރުހަބާކިޔާފައެވެ.
އަލްއުދައިދު ވައިގެ ބަނދަރަކީ 1 ބިލިއަން ޑޮލަރު ޚަރަދުކޮށްގެން 1996 ވަނަ އަހަރު ޤަޠަރުން ބިނާކުރި މަރުކަޒެކެވެ. އެމެރިކާ ސިފައިން އެ މަރުކަޒު ބޭނުންކުރަން ފެށީ 2001 ވަނަ އަހަރު އަފްޣާނިސްތާނުގެ ޠާލިބާނުންނާ ދެކޮޅަށް ކުރި ހަނގުރާމައިގައެވެ. ފުރަތަމަ ސިއްރު މަރުކަޒެއްގެ ގޮތުގައި ބޭނުންކުރަމުން އައިސް، އަލްއުދައިދު ވައިގެ މަރުކަޒު އެމެރިކާ ސިފައިން ބޭނުންކުރާކަން އެމެރިކާއިން ހާމަކުރީ 2002 ވަނަ އަހަރުގެ މާރިޗު މަހުގައެވެ.
މެދުއިރުމަތީގައި އެމެރިކާގެ 40 ހާހެއްހާ ސިފައިން ތިބެއެވެ. ބަހުރޭންގައި މަރުކަޒުކުރެވިފައިވާ އެމެރިކާގެ ފަސްވަނަ ފްލީޓުގައި 28 ހާސް ސިފައިން ހަރަކާތްތެރިވެއެވެ.
