މެދުއިރުމަތީގައި ގަދަވަމުންދާ އީރާނުގެ ނުފޫޒު ކުޑަކޮށް އެގައުމު އެކަހެރިކުރުމުގެ މަގްސަދުގައި މެދުއިރުމަތީގެ އިސްތިރާތީޖީ އިއްތިހާދެއް އުފައްދުމުގެ މަޝްވަރާތައް ކުރަމުންދާ ކަމުގައި އެމެރިކާއިން ބުނެފިއެވެ.
މިސުރަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އިއްޔެ ގާހިރާގެ އެމެރިކަން ޔުނިވަސިޓީ އޮފް ކައިރޯގައި ތަގުރީރުކުރައްވަމުން އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވީ މީޑްލް އީސްޓް ސްޓްރެޓީޖިކް އެލަޔަންސް (މީސާ) ގެ ނަމުގައި އުފައްދާ މި އިއްތިހާދުން މެދުއިރުމައްޗަށް ކުރިމަތިވާ ނުރައްކާތަކާ ކުރިމަތިލައި، ހަކަތައާއި އިގްތިސާދު ކުރިއެރުވަށް އެހީތެރިވާނެ ކަމުގައެވެ.
ޕޮމްޕެއޯ ވިދާޅުވިގޮތުގައި އެ އިއްތިހާދު އެކުލުވިގެންވާނީ ގަލްފް ކޯޕަރޭޝަން ކައުންސިލް (ޖީސީސީ) ގެ މެންބަރު ގައުމުތަކާއި، މިސްރާއި، ޖޯޑަނުގެ މައްޗަށެވެ.
"ޓްރަމްޕްގެ ސަރުކާރުން ދަނީ މިޑްލް އީސްޓް ސްޓްރެޓީޖިކް އެލަޔަންސް -ނުވަތަ މީސާ- އުފެއްދުމުގެ މަސައްކަތްވެސް ކުރަމުން. އެއީ އެންމެ ނުރައްކާތެރި ބިރުދެއްކުންތަކާއި ކުރިމަތިލައި، ހަކަތައާއި، އިގްތިސާދީ ދާއިރާއިން އެއްބާރުލުން އިތުރުކުރުމަށް. މި މަސައްކަތުން ގަލްފް ކޯޕަރޭޝަން ކައުންސިލްގެ މެންބަރުންގެ އިތުރަށް މިސުރާއި ޖޯޑަންގެ ގުޅުމެއް އުފެއްދޭނެ. މި މަސައްކަތްތައް ވަރުގަދަކުރުމަށް މިއަދު މިގައުމުތަކަށް އަހަރެން ގޮވާލަން." ޤާހިރާގައި ވާހަކަފުޅު ދައްކަވަމުން ޕޮމްޕެއޯ ވިދާޅުވިއެވެ.
އެމެރިކާ ސަރުކާރުގެ އިސް މަސްއޫލުވެރިން އުއްމީދުކުރައްވާ ގޮތުގައި މެދު އިރުމަތީގައި އުފައްދާ އިއްތިހާދު ވެގެން ދާނީ މެދުއިރުމަތީގެ ނޭޓޯ ކަމުގައެވެ.
ޚާރިޖީ ވަޒީރު ޕޮމްޕެއޯ މި މޭރުމުން ވާހަކަފުޅުދައްކަވާފައި ވަނީ ޖީސީސގެ ހަ ގައުމު ކަމުގައިވާ ސައޫދީ އަރަބިއްޔާ، އޮމާން، ޔޫއޭއީ، ބަހްރޭން، ޤަޠަރު، ކުވޭތު ގެ އިތުރަށް ޖޯޑަނަށާއި މިސްރަށް ކުރައްވާ ރަސްމީ ދަތުރުފުޅެއްގައި މިސްރަށް ވަޑައިގެންނެވެ.
މިސްރަށް ވަޑައިގަތުމުގެ ކުރިން ޕޮމްޕެއޯ ވަނީ ޖޯޑަށް ވަޑައިގެންފައެވެ. ޖޯޑަނުގެ ވެރިރަށް އައްމާނުގައި ޕޮޕްމެއޯއާ ދެބޭފުޅުން ބޭއްވެވި ނޫސްވެރިންގެ ބައްދަލުވުމުއްގައި ޖޯޑަނުގެ ޚާރިޖީ ވަޒީރު އައިމަން ސަފަދީ ވިދާޅުފައި ވަނީ "ސަރަހައްދުގައި އީރާނުގެ ދައުރުފުޅާކުރުމަށް އެގައުމުން ގެންގުޅޭ ސިޔާސަތާމެދު އަހަރުމެން އެންމެންވެސް ކަންބޮޑުވޭ. އަހަރުމެން އެންމެންވެސް ބޭނުންވަނީ އެކަމުގެ އަސަރު ކުޑަކުރަން."
