ސޫދާނުގެ ރައީސު ޢުމަރު ޙަސަން އަލްބަޝީރުގެ އިސްތިއުފާއަށް ގޮވާލާ ކުރިއަށްދާ މުޒާހަރާތައް އިއްޔެ ވަކިން ބޮޑުވެފައިވާ ކަމަށް ޚަބަރުތައް ބުނެއެވެ. ސަރުކާރާ ދެކޮޅަށް ފަށާފައިވާ ސިލްސިލާ މުޒާހަރާތަކުގެ ތެރެއިން އުއްމުދުރްމާނުގައި ބުދަދުވަހު ފެށުނު މުޒާހަރާ އިއްޔެވެސް ކުރިއަށް ދިޔައިރު، މިހާތަނަށް ތިން މީހުން މަރުވެފައިވާ ކަމަށް ވެއެވެ.
އިސްތިއުފާނުދެއްވާނެކަމަށް ވިދާޅުވެ ރައީސު އަލްބަޝީރު ޚިޠާބެއް ދެއްވިފަހުން މާގިނަ އިރުތަކެއް ނުވެ، "މިނިވަންކަން އަމާންކަން އަދުލުވެރިކަން" "އިންގިލާބަކީ ރައްޔިތުން އިޚްތިޔާރުކުރާ ގޮތް" ފަދަ ޝިއާރުތަކާ އެކު މުޒާހަރާކުރާ މީހުން ނުކުމެ ވަނީ ވެރިރަށް ޚުރްޠޫމާ އިންވެގެން އޮން އުއްމުދުރްމާނުގެ މައި މަގު ބަންދުކޮށްފައެވެ. އަދި މުޒާހަރާ ރޫޅާލުމަށް ސަލާމަތީ ބާރުތަކުން ވަނީ ކަރުނަ ގޭސް ބޭނުންކޮށް، އިންޒާރުގެ ބަޑިވެސް ޖަހާފައެވެ.
މުޒާހަރާގައި ޒަޚަމްވީ ބައެއް މީހުން ފަރުވާ ހޯދަން ވަން ހޮސްޕިޓަލަށް ސަލާމަތީ ބާރުތަކުން ވަދެ ހޮސްޕިޓަލް ތެރެއަށް ކަރުނަގޭސް ޖަހައި، ބަޑިވެސް ޖަހާފައިވާ ކަމަށް އެމްނެސްޓީ އިންޓަނޭޝަނަލް ޖަމާއަތުން ބުނެފައި ވެއެވެ.
އެޖަމާއަތުން ބުނި ގޮތުގައި ހޮސްޕިޓަލަށް ވަން ސިފައިން ވަނީ ޑޮކްޓަރުންނާއި ބަލިމީހުންނާ މެދު ހަރުކަށިކޮށް މުއާމަލާތްކޮށްފައެވެ.
"ހޮސްޕިޓަލަށް ދިން މި ހަމަލާއަކީ ކަނޑައެޅިގެން ބައިނަލް އަގްވާމީ ގާނޫނުތަކާ ޚިލާފަށް ހިންގި އަމަލެއް" އެމްނެސްޓީ އިންޓަނޭޝަނަލްގެ އިރުމަތީ އެފްރިކާގެ ޑިރެކްޓަރު ސާރާ ޖެކްސަން ނެރުއްވި ބަޔާނެއްގައި ވެއެވެ.
ޕާނާއި ބަނަހާއި ރޮށި ފަދަ ތަކެތީގެ އަގު ތިންގުނައަށް ބޮޑުކުރަން އަލްބަޝީރުގެ ސަރުކާރުން ނިންމުމާ ގުޅިގެން މީގެ ހަފުތާއެއްހާ ދުވަސް ކުރިން ވެރިރަށް ޚުރްޠޫމުގައި ފެށުނު މުޒާހަރާތައް ފުޅާވެ، މިހާރު ވަނީ ސަރުކާރާ ދެކޮޅަށް ކުރާ އާއްމު މުޒާހަރާތަކަކަށް ބަދަލުވެފައެވެ.
އުއްމުދުރްމާނުގެ މައި ހޮސްޕިޓަލަށް ސަލާމަތީ ބާރުތަކުން ވަދެގަތް އިރު، މުޒާހަރާތަކުގައި ޒަޚަމްވި ހަ މީހަކު ފަރުވާ ހޯދަމުން ދިޔަކަމަށް ހޮސްޕިޓަލުގެ ޑޮކްޓަރުންނާ ހަވާލާދީ އޭއެފްޕީން ޚަބަރުދީފައި ވެއެވެ. އެހެންނަމަވެސް، އެއްވެސް މީހަކު ހައްޔަރުކޮށްގެން ގެންދިޔަކަން އެނގިފައި ނުވެއެވެ.
