ބޮލީވުޑްގެ އެކަޓަރ އަދި ސްކްރީން-ރައިޓަރ ކާދަރް ޚާން މަރުވެއްޖެއއެވެ. އޭނާ މަރުވީ ކެނެޑާގެ ހޮސްޕިޓަލެއްގައި އަންގާރަ ދުވަހުގެ ހެނދުނުގެ ވަގުތެއްގައެވެ. މަރުވި އިރު އުމުރަކީ 81 އަހަރެވެ.
ކާދަރް ޚާން މަރުވި ކަން އޭނާގެ ދަރިފުޅު ސަރްފަރާޒް ޚާން ވަނީ މީޑިއާއަށް ކަށަވަރު ކޮށްދީފައެވެ. އޭނާއާ ޙަވާލާދީ ބޮލީވުޑްގެ ޚަބަރުތައް ގެނެސްދޭ ނޫސްތަކުން ރިޕޯޓުކުރާ ގޮތުގައި ކާދަރް ޚާން މަރުވީ ބަލިވެ އުޅޭތާ މަސްތަކެއް ފަހުންނެވެ. އަދި ހޮސްޕިޓަލުގައި ފަރުވާ ހޯދަމުންދާތާ ވެސް 16 -17 ހަފްތާ ވެއްޖެ ކަމަށް ސަރްފަރާޒް ވަނީ ބުނެފައެވެ. މަރުވީ ކޯމާ އެއްގައި އޮވެއެވެ.
ކާދަރް ޚާން އަކީ ކާބުލް އަށް އުފަން މީހެކެވެ. އެނާ ފިލްމީ ދާއިރާ އަށް ވަނީ 1973ވަނަ އަހަރު ރާޖޭޝް ކަންނާގެ 'ދާގް' އިން ނެވެ. އޭނާ އަކީ އާދަޔާ ޚިލާފަށް މޮލު އެކްޓަރެކެވެ. އަދި ކުޅަދާނަ ކޮމޭޑިއަން އެކެވެ. ނަމަވެސް ކަކުލުގެ އޮޕަރޭޝަނަކަސް ފަހު އޭނާ ވަނީ އެކްޓިން އާ ދުރަށް ގޮސްފައެވެ.
ކާދަރް ޚާން ވަނީ 300 އަށްވުރެ ގިނަ ފިލްމުގައި އެކްޓަރެއްގެ ގޮތުން މަސައްކަތް ކޮށްފައެވެ. އޭގެ އިތުރުން އޭނާވަނީ 250 އަށްވުރެ ގިނަ ފިލްމުތަކަށް ޑައިލޮގް ލިޔެދީފައެވެ. އޭގެ ތެރޭގައި 'ޢާންކޭން'، 'މޭ ކިލާޅީ ތޫ އަނާޅީ'، 'ޖުޅުވާ'، 'ބީވީ ތޯ އޭސާ'، 'ބޯލް ރާދާ ބޯލް' ފަދަ ފިލްމުތައް ހިމެނެއެވެ.
އޭނާ ވަނީ ފިލްމު ކެރިއަރުގައި 45 އަހަރަށްވުރެ ގިނަ ދުވަސް ހޭދަކޮށްފައެވެ، މިދުވަސްތަކުގެ ތެރޭގައި އޭނާގެ އެންމެ ބޮޑު އަދި ކާމިޔާބު ދުވަސްވަރަކީ ޑޭވިޑް ދަވަން އާއި ގޯވިންދާ އާއެކު 1990ގެ އަަރުތަކުގައެވެ. މި ތިން މީހުް ގުޅިގެން 'ސާޖަން ޗަލޭ ސަސުރާލް'، 'ހީރޯ ނަމްބަރ ވަން'، 'ކޫލީ ނަމްބަރ ވަން'، 'ދުލްހޭ ރާޖާ' 'ހަސީނާ މާން ޖާއޭ' ފަދަ ބްލޮކްބަސްޓަރ ފިލްމުތައް ގެނެސްދީފައި ވެއެވެ.
ކާދަރް ކާންގެ ޖަނާޒާގެ ކަންތައް ކުރިއަށް ދާނީ ކެނެޑާގެ ޓޮރޮންޓޯ ގައެވެ. އޭނާ މަރުވި އިރު އަންހެނުން ހާޖަރާ އާއި ދަރިފުޅު ސަރްފަރާޒް އަދި ކާފަ ކުދީންް ދުނިޔޭގައި އެބަތިއްބެވެ.
