ހުވަދުއަތޮޅު އުތުރުބުރީ ވިލިގިލީގައި ހުންނަ ބޭންކްއޮފް މޯލްޑިވްސްގެ ބްރާންޗު ފަޅާލައި ވަގަށްނަގައިފައިވާ ފައިސާގެ ބޮޑު ބައެއް ފުލުހުން ހޯދައިފިއެވެ.
ފުލުހުންގެ މަސައްކަތުން ވަނީ އެފައިސާގެ ތެރެއިން ގާތްގަޑަކަށް 90 އިންސައްތަ ހޯދައިފައެވެ. އާފަތިހަށް ކަށަވަރުވެފައިވާ ގޮތުގައި އެފައިސާ ހޯދައިފައިވަނީ ސުނާމީގައި ހަލާކުވި ގެތަކުގެ ބަދަލުގައި އަޅައިދީފައިވާ ފަޅުގެއެއްގެ ކޮޓަރި ތެރެއިންނެވެ. ގެއްލުނު ފައިސާގެ ތެރެއިން ނުފެނި ބާކީހުރި ފައިސާ ހޯދުމުގެ މަސައްކަތް ފުލުހުން ވަރަށްބާރަށް ކުރިއަށް ގެންދާ ކަމަށް މަޢުލޫމާތު ލިބިފައިވެއެވެ.
ބޭންކު ފަޅާލި މީހުން އެކަން ކޮށްފައިވަނީ ތަފާތު އާލާތްތައް ބޭނުންކޮށްގެން ބޭންކުގެ ފުރާޅު ހަލާކުކޮށްގެން އެތެރެއަށް ވަދެއެވެ. މި މައްސަލާގައި މިހާތަނަށް 6 މީހުންވަނީ ބަންދުކޮށްފައެވެ. އޭގެ ތެރެއިން 5 މީހުންނަކީ ވިލިގިއްޔަށް ނިސްބަތްވާ މީހުންނެވެ. ދެންހުރީ އެރަށުގެ ވޯކްޝޮޕެއްގައި މަސައްކަތްކުރާ ލަންކާ މީހެކެވެ.
މި މައްސަލާގައި ބައެއް ނޫސްތަކުން ބުނެފައިވަނީ ގެއްލުނު ފައިސާގެ ތެރެއިން 14 މިލިއަން ރުފިޔާ ފުލުހުން ހޯދައިފި ކަމަށެވެ. އެހެންނަމަވެސް ފުލުހުން ވިދާޅުވީ އެއްވެސް ނޫހަކަށް ފައިސާގެ ޢަދަދާބެހޭ ގޮތުން މަޢުލޫމާތު ދެއްވައިފައި ނުވާނެ ކަމަށެވެ.
ބޭންކުން ވިދާޅުވީ ތަޙުޤީޤު ކުރަމުންދާ މައްސަލައަކަށް ވާތީ އެކަމާ މެދު އެއްޗެއް ވިދާޅުވެވެންނެތް ކަމަށެވެ. މިވަގުތު އެކަމަށް ޖަވާބު ދެއްވާނީ ފުލުހުން ކަމަށް ވެސް ވިދާޅުވިއެވެ.
ޙާދިސާ ހިންގި ހޮނިހިރު ދުވަހުން ފެށިގެން އެ ބްރާންޗާއީ އެތަނާ އިންވެގެންހުރި އޭޓީއެމްގެ ޚިދުމަތް ވެސް ވަނީ މެދު ކެނިޑފައެވެ. އަލުން ޚިދުމަތް ދޭން ފަށާނީ އެތަން ފުލުހުން ދޫކޮށްލުމުން ކަމަށް ބޭންކުން ވިދާޅުވިއެވެ.
