ރިޔާސީ ލޯންޗުކޮޅު ފިނިފެންމާ ގޮއްވާލުމަށްޓަކައި، ކުރީގެ ނައިބުރައީސް އަޙުމަދު އަދީބު ވިދާޅުވެގެން އައިއީޑީއެއް ނުވަތަ ގޮވާއެއްޗެއް ތައްޔާރުކުރިކަމަށް، އަދީބާ ދެކޮޅަށް މީހަކު ހެކިބަސްދީފިއެވެ.
މިއަދު ބޭއްވި ޝަރިޢަތުގެ މަޖިލީހުގައި ހެކިބަސްދެމުން އެމީހާބުނީ ރިޔާސީ ލޯންޗުކޮޅު ގޮއްވާލުމަށްޓަކައި އައިއީޑީއެއް ހެދުމަށް އަދީބު އޭނާއަށް އެންގެވިކަމަށެވެ. އަދި އޭގެކުރިންވެސް އެފަދަ ބައެއް ކަންކަން އޭނާއާ އަދީބު ޙަވާލުކުރައްވާފައިވާކަމަށް އޭނާ މިއަދު ބުންޏެވެ. އެގޮތުން މިދިޔަ އަހަރުގެ މެއިމަހުގެ ފުރަތަމަދުވަހު އިދިކޮޅު ފަރާތްތަކުން މަލޭގައިކުރި މޭޑޭ މުޒާހަރާއާދިމާކޮށް ގޮއްވާލުމަށް ވެސް އޭނާވަނީ އަދީބު އަންގަވައިގެން އައިއީޑީ އެއް ތައްޔާރުކޮށްދީފައިކަމަށް އެމީހާ މިއަދު ބުންޏެވެ.
މީގެއިތުރުން އޭރު އިދިކޮޅު ސިޔާސީފަރާތްތަކުން ހިންގަމުންދިޔަ ކަންކަމާދެކޮޅަށް ސިޔާސީ ސްޓަންޓެއް ޖެއްސެވުމުގެގޮތުން، ޓެސްޓެއްގެ ގޮތުން، ގަލްފް ކްރާފްޓްގެ ލޯންޗެއް ގޮއްވާލުމަށް ވެސް، އަދީބުގެ ވިދާޅުވެގެން އައިޑީއެއް ތައްޔާރުކޮށްދިން ކަމަށް އެމީހާ ބުންޏެވެ. އޭނާވަނީ އެ އައިއީޑީ ތައް ތައްޔާރުކުރި ގޮތާއި އޭގެ ތަފްސީލު މިއަދުގެ ޝަރީޢަތުގެ މަޖިލީހުގައި ހާމަކޮށްފައެވެ.
އޭނާ މިއަދު އަދީބާދެކޮޅަށް ހެކިބަސްދިނީ ސިއްރު ހެއްކެއްގެ ގޮތުގައެވެ.
