އާޓިފިޝަލް ބީޗުތެރޭގައި ބަހައްޓައިފައިވާ ވެހިކަލްތައް ނެގުމަށް ފުލުހުން އަންގައިފިއެވެ.
ފުލުހުން ވިދާޅުވެފައިވަނީ ބީޗުތެރޭގައި ހުރި ވެހިކަލްތައް ނެގުމަށް އެންގެވީ މިއަދު ބޭއްވުމަށް ހަމަޖެހިފައިވާ ޙަރަކާތަކާ ގުޅިގެން ކަމަށެވެ. މިއަދު މެންދުރު ފަހު 3:00 އާ ހަމަ ފުލުހުންވަނީ އެތަކެތި ނެގުމަށް މުހުލަތު ދެއްވައިފައެވެ. ތިނެއްގެ ފަހުން އެސަރަޙައްދުގައި ޕާކުކޮށްފައިވާ ވެހިކަލްތައް ނަގާނެ ކަމަށް ވެސް ފުލުހުން ވަނީ ވިދާޅުވިއެވެ.
2018 ވަނަ އަހަރު ނޮވެމްބަރު 18 "ވަނަ ދުވަހު ބޭއްވުމަށް ހަމަޖެހިފައިވާ އިވެންޓަކާ ގުޅިގެން އާޓިފިޝަލް ބީޗުތެރޭ ޕާކުކޮށްފައިވާ އެންމެހާ ވެހިކަލްތައް މިއަދުގެ 3:00 ގެ ކުރިން އެތަނުން ނެގުމަށް ދަންނަވަން. އަދި ދެނެންވިފައިވާ ވަގުތުގެ ފަހުން އެސަރަޙައްދުގައި ޕާކުކޮށްފައި ހުންނަ ވެހިކަލްތައް ޓޯ ކުރެވޭނެ ވާހަކަ ދަންނަވަން،" ފުލުހުން ވިދާޅުވިއެވެ.
އައު ރައީސް އިބްރާހީމް މުޙައްމަދު ޞާލިޙު ހުވައި ކުރެއްވުމުގެ އުފަލުގައި މިއަދާއި މާދަމާ މާލޭގައި ކުޅިވަރު ފެސްޓިވަލެއް ބޭއްވުމަށް ވަނީ ހަމަޖެހިފައެވެ. އޭގެ ބައެއް ޙަރަކާތްތައް އާޓިފިޝަލް ބީޗު ސަރަޙައްދުގައި ވެސް ކުރިއަށް ގެންދިއުމަށްވަނީ ނިންމަވައިފައެވެ.
މިއީ ހުރިހާ ޢުމުރެއްގެ މީހުންނަށް ބައިވެރިވެވޭ ގޮތަށް ހުޅުވާލައިގެން ބާއްވާ ފެސްޓިވަލެކެވެ. އޭގާއި ރާއްޖޭގެ ކުރީގެ ބައެއް ރައީސުން ބައިވެރިވެ ވަޑައިގަންނަވާނެއެވެ.
