ރާއްޖެއިން އިންޑިއާއަށް ކަނޑައަޅުއްވައިފައި ހުންނަވާ ސަފީރު އަދި ކުރީގެ މިނިސްޓަރ އަޙުމަދު މުޙައްމަދު ސަފީރު ކަމުން އިސްތިއުފާ ދެއްވުމަށްފަހު ވަރަށް އަވަހަށް މާލެ ވަޑައިގަންނަވާނެ ކަމަށް ވިދާޅުވެއްޖެއެވެ.
އަޙުމަދު ކުރައްވައިފައިވާ ޓްވީޓެއްގައި ވިދާޅުވެފައިވަނީ ފާއިތުވި 3 އަހަރާއި 9 މަހު ސަފީރެއްގެ ގޮތުގައި މަސައްކަތް ކުރެއްވުމަކީ ލިބިފައިވަޑައިގެންނެވި ޝަރަފެއް ކަމަށް ދެކެވަޑައި ގަންނަވާ ކަމަށެވެ.
އަޙުމަދު މަޤާމުން އިސްތިއުފާ ދެއްވަން ނިންމެވީ ސިޔާސީ މަޤާމްތަކުގައި ތިއްބެވި ބޭފުޅުން އިސްތިއުފާ ދެއްވުމަށް ރައީސް މުންތަޚަބު އިބްރާހީމް މުޙައްމަދު ޞާލިޙުގެ ތަރުޖަމާނު މާރިޔާ އަޙުމަދު ދީދީ ގޮވައިލައްވައިފައި ވަނިކޮށްނެވެ.
އަޙުމަދުގެ އިތުރަށް ރާއްޖެއިން ލަންކާއަށް ކަނޑައަޅުއްވައިފައި ހުންނެވި ސަފީރު މުޙައްމަދު ޙުސައިން ޝަރީފާއި މެލޭޝިއާއަށް ކަނޑައަޅުއްވާފައި ހުންނަވާ ސަފީރު މުޙައްމަދު ފަޔާޒު ވެސް ވަނީ އިސްތިއުފާ ދެއްވައިފައެވެ. ސަރުކާރުގެ ސިޔާސީ އެހެން މަޤާމްތަކުގައި ތިއްބެވި ބޭފުޅުން ވެސް ގެންދަވަނީ އިސްތިއުފާ ދެއްވަމުންނެވެ.
އަޙުމަދު މުޙައްމަދަކީ ދައުލަތުގެ މިނިސްޓަރުކަމާއި، އެސްޓީއޯގެ ޗެއާމަން ކަމާއި އަދިވެސް އިތުރު މަޤާމްތަކެއް ފުރުއްވައިފައިވާ ޚިދުމަތްތެރި ބޭފުޅެކެވެ.
