ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ދިރިއުޅުއްވަމުން ގެންދެވި ސަރުކާރުގެ ގެކޮޅު ކަމަށްވާ ހިލާލީގެއިން އަމިއްލަ ގެކޮޅު، ހ. ދޫވެއްސަށް ބަދަލުވެ ވަޑައިގެންފިއެވެ.
އެމަނިކުފާނު ހިލާލީ ގެއިން އަމިއްލަ ގެކޮޅަށް ބަދަލުވެ ވަޑައިގެންނެވީ އެމަނިކުފާނުގެ ވެރިކަމުގެ ދައުރު މާދަމާ ނިމި އައު ސަރުކާރު ހުވައިކުރައްވާތީއެވެ. މާދަމާ، އައު ރައީސް އިބްރާހީމް މުޙައްމަދު ޞާލިޙާއި، އެމަނިކުފާނުގެ ނާއިބު ފައިސަލް ނަސީމް ހުވައި ކުރެއްވުމަށްފަހު ރައީސް ޞާލިޙު އުޅުއްވާނީ މުލިއާގޭގައެވެ. ނާއިބު ފައިސަލް ދިރިއުޅުއްވާނީ ހިލާލީގޭގައެވެ.
މުލިއާގެ ވަނީ ވަރަށް ބޮޑަށް ހަލާކުވެފައި ކަމަށާއި އެހެންވެ އަލުން އެތަން މަރާމާތު ކުރުމުގެ މަސައްކަތް ކުރައްވަމުން ގެންދަވާ ކަމަށް ރައީސް މުންތަޚަބު އިބްރާހީމް މުޙައްމަދު ޞާލިޙުގެ ތަރުޖަމާނު މާރިޔާ އަޙުމަދު ދީދީ ވިދާޅުވެފައިވެއެވެ.
ރައީސް ޔާމީން މިއަދު އެމަނިކުފާނުގެ އަމިއްލަ ގެކޮޅަށް ބަދަލުވެ ވަޑައިގެންނެވިއިރު އެގެ ހަދައި ނުނިމެއެވެ.
