ބޭ އޮފް ބެންގާލްގައި އުފެދުުުނު ވަރުގަދަ ޠޫފާން 'ގާޖާ' ރޭ ދަންވަރުގެ ވަގުތެއްގައި އިންޑިޔާގެ އިރު ދެކުނު ސްޓޭޓެއް ކަމުގައިވާ ޓެމިލްނާޑޫއަށް އަަރައިފިއެވެ.
ގަޑިއަކު 120 ކިލޯމީޓަރުގެ ބާރުމިނުގައި ޖެހުނު ވަޔާ ބޯ ވިއްސާރައާއެކު ރޭ 2:00 ހާއިރު ޓެމިލްނާޑޫގެ ނާގާޕައްޓިނަމް އަދި ވެޑަރައްނިޔަމް ޑިސްޓްރިކްޓް ހުރަސްކުރި ޠޫފާން އަރައިގެން ދިޔަ ސަރަހައްދަށް ވަނީ ބޮޑެތި ގެއްލުންތަކެއް ލިބިފައެވެ.
ކަމާބެހޭ އިދާރާތަކުން ކުރިން ރައްކާތެރިކަމުގެ ފިޔަވައަޅު އަޅައި އެ ސަރަހައްދު މީހުން ދުރަށް ގެންގޮސްފައިވާތީ މީހަކު މަރުވި ޚަބަރު ނުލިބުނަސް، އެ ސަރަހައްދުގައި ހުރި އާދައިގެ ގެތަކާ، ޖިފުޓިތައް ހަލާކުވެ، ކަރަންޓު ކޭބަލްތައް ކަނޑައިގެން ގޮސް، ގިނަ އަދަދެއްގެ ރުއްގަސް ވެއްޓިފައި ވެއެވެ. އަދި އައްސޭރިފަށުގައި ހުރި ކުދި މަސްވެރި އަވަށްތަކަށް ލޮނުއަރައި ފެންބޮޑުވެފައިވާ ކަމުގެ ޚަބަރުތައްވެސް ލިބެމުން ދެއެވެ. ލިބުނު ގެއްލުމު ތަފްޞީލު އަދި ލިބިފައި ނުވެއެވެ.
ޠޫފާން އަރަނެކަމަށް ލަފާކުރެވޭ ސަރަހައްދުތަކުން ކަރަންޓު ކުރިން ކަނޑާލާފައި ވާއިރު، އެ ސަރަހައްދު ހުރަސްކޮށް ކުރާ ރޭލު ދަތުރުތައްވެސް ވަނީ ކެންސަލްކޮށްފައެވެ.
އިންޑިޔާގެ މޫސުމާބެހޭ އިދާރާއިން ލަފާކޮށްފައިވާ ގޮތުގައި އެއްގަމަށް އަރާތާ ހަގަޑިއެއްހާއިރުގެ ތެރޭގައި ޠާނުގެ ބާރުދެރަވެ އާދައިގެ ވިއްސާރައަކަށް ބަދަލުވާނެއެވެ.
ނޭޝަނަލް ޑިޒާސްޓާ ރިލީފް ފޯސްގެ 9 ހާސް މީހުން 4 ސަރަހައްދެއްގައި މަސައްކަތްކުރަމުން ދާއިރު އިންޑިޔާ ކަނޑުގެ ސިފައިންގެ ދެ މަނަވަރު ހެލިކޮޕްޓަރާއި، ރަބަރު ޑިންގީއާއެކު ޠޫފާން އެރި ސަރަހައްދުގައި އެހީ ފޯރުކޮށްދިނުމުގެ މަސައްކަތްކުރަމުން އެބަދެއެވެ.
ޓެމިލްނާޑޫ ސްޓޭޓްގެ ޑިޒާސްޓާ މެނޭޖްމަންޓް އޮތޯރިޓީން ހަމާކުރި ގޮތުގައި ޠޫފާން އަރާނެކަމަށް ލާފަކުރެވޭ ސަރަހައްދުން 76 ހާސް މީހުން އެހެން ހިސާބުތަކަށް ގެންގޮސް ހަ ޑިސްޓްރިކްޓެއްގެ 300 ވަގުތީ ހިޔަލުގައި އެމީހުން ވަނީ ބައިތިއްބާފައެވެ. މޫސުމާ ބެހޭ އިދާރާއިން ލަފާކުރާ ގޮތުގައި ޑެމިލްނާޑޫެއާއި ޕޮންޑިޗަރީގެ ގިނަ ސަރަހައްދުތަކަކަށް 20 ސެންޓިމީޓަރުގެ ވާރޭ ވެހުން އެކަށީގެން ވެއެވެ.
