ރަސޫލެއް ކަމަށް ދަޢުވާކޮށް، ކިރީތި ރަސޫލާއަށާއި، އިސްލާމްދީނަށް ފުރައްސާރަކޮށް ފޭސް ބުކުގައި ވީޑިއޯ ޢާއްމުކުރި ޢާއިޝަތު ވެލްޒިނީ (ކުއީން ޢާއިޝާ) ބަންދު ކުރެއްވުމަށްފަހު ފުލުހުން އޭނާ ދޫކޮށްލެއްވީ ޑެންމާކުގެ ޑޮކްޓަރުން ދީފައިވާ މެޑިކަލް ލިޔުންތަކަކަށް ރިޢާޔަތް ކޮށް ކަމަށް މަޢުލޫމާތު ލިބިއްޖެއެވެ.
ވެލްޒިނީއަކީ ސިކުނޑީގައި އުނިކަމެއް ހުންނަ މީހެއް ކަމަށް އެ ލިޔުންތަކުގައި ބުނެފައިވާ ކަމަށް ވެސް މަޢުލޫމާތު ލިބިފައިވެއެވެ. މިކަމާ ބެހޭ ގޮތުން ފުލުހުންނަށް ގުޅުމުން ވިދާޅުވީ އެކަން ބަލާފައި މަޢުލޫމާތު ޙިއްސާ ކުރައްވާނެ ކަމަށެވެ.
ފުލުހުން މިހާރުވަނީ ވެލްޒިނީއަށް ބޭސްފަރުވާ ކުރުމަށް ޑޮކްޓަރުން ލަފާދީފައިވާތީ އޭނާގެ ޢާއިލާއާ ޙަވާލު ކޮށްފައެވެ. ވެލްޒިނީ އެޑްމިޓް ކޮށްގެން އޭނާއަށް ފަރުވާ ދިނުމަށް އިރުޝާދު ދީފައިވަނީ ކޮން ޑޮކްޓަރެއް ނުވަތަ ޑޮކްޓަރުން ކަމެއް ފުލުހުން ވިދާޅެއް ނުވިއެވެ. އެއީ ރާއްޖެއިން ބޭރު ޑޮކްޓަރެއްތޯ ނޫންތޯ ވެސް ވިދާޅެއް ނުވެއެވެ.
މަޢުލޫމާތު ލިބިފައިވާ ގޮތުގައި އޭނާއަށް މިހާރު ގެންދަނީ ހޮސްޕިޓަލުގައި ފަރުވާ ދެމުންނެވެ. އޭނާ ދޫކޮށްލެއްވިޔަސް ޤާނޫނީ ގޮތުން ކުރައްވަންޖެހޭ ކަންކަން ކުރައްވަމުން ގެންދަވާ ކަމަށް ފުލުހުންވަނީ ވިދާޅުވެފައެވެ.
ވެލްޒިނީ ރާއްޖެ އައީ ގިނަ ދުވަސްތަކެއް ވަންދެން ރާއްޖެއިން ބޭރުގައި އުޅުމަށްފަހުގައެވެ. އޭނާއަކީ ރައީސް ނަޝީދުގެ ފަރާތްޕުޅުން ޖޭއޭސްސީގެ މެމްބަރެއްގެ ގޮތުގައި ކުރިން އިންނެވި މީހެކެވެ. އެހެންނަމަވެސް އޭނާ ވަނީ ފަހުން ރައީސް ނަޝީދަށް ވެސް ވަރަށް ބޮޑަށް ފާޑުކިޔައިފައެވެ.
