މޯލްޑިވްސް ޙައްޖު ކޯޕަރޭޝަނުގެ ފަރާތުން ޙައްޖަށް ދިޔުމަށްޓަކައި ފައިސާ ދެއްކި މީހުންގެ ތެރެއިން 300 މީހުންގެ ފައިސާ ޙައްޖު ކޯޕަރޭޝަނުގައި މިހާރު ނެތް ކަމަށާއި އެފައިސާ މިހާރު ވަނީ ބޭނުންކޮށް ހުސްކޮށްފައި ކަމަށް އިންތިގާލީ ކޮމިޓީން މިއަދު ބުނެފިއެވެ.
ނޫސްވެރިންނަށް މައުލޫމާތު ދެއްވަމުން އެކޮމިޓީގެ މެމްބަރު ކުރީގެ މަޖިލިސް މެމްބަރު އިލްޔާސް ލަބީބު ވިދާޅުވީ 300 މީހުން ދެއްކި ފައިސާ ބޭނުން ކޮށްފައިވާ ކަމަށާއި އެއީ 30 މިލިއަން ރުފިޔާ ކަމަށެވެ. އެހެންކަމުން އެ 300 މީހުންނަށް ދެން ޙައްޖަށް ދެވެން އޮތްގޮތަކީ އެފައިސާ ޙައްޖު ކޯޕަރޭޝަނަށް އަނބުރައި ވެއްދުން ކަމަށް އިލްޔާސް ވިދާޅުވިއެވެ.
އިލްޔާސް ވިދާޅުވީ ފައިސާ އަނބުރައި ޙައްޖު ކޯޕަރޭޝަނަށް ވައްދައިގެން ނޫނީ އެ 300 މީހުންނަށް ޙައްޖަށް ނުދެވޭނެ ކަމަށާއި އެހެންވެ އެކަމުގައި ދެންއޮތް ގޮތްތަކީ އެ ކުންފުނީގެ ޙިއްސާއެއް ވިއްކާލައިގެން ފައިސާ ހޯދުން ނުވަތަ ކުންފުނީގެ މުދަލެއް ވިއްކާލައިގެން ފައިސާ ހޯދުން ނުވަތަ ސަރުކާރުން އެވަރަށް ފައިސާ ލުންކަމަށްވެސް އޭނާ ވިދާޅުވިއެވެ.
އިލްޔާސް ވިދާޅުވީ ޙައްޖު ކޯޕަރޭޝަނުގެ ތެރެއިން ކޯޓާ ދޫކުރުމުގައިވެސް ސިޔާސީ ބާރުހުރި ފަރާތްތަކުގެ ނުފޫޒުވަދެ، ވަކިބަޔަކަށް ކޯޓާ ދޫކުރުންވެސް އިންތިހާއަށް ގޮސްފައި އޮތް ކަމަށެވެ.
