ރައީސް ޢަބްދުﷲ ޔާމީންގެ ސަރުކާރުން އައްޑޫސިޓީގައި އަޅުއްވައި ދެއްވަމުން ގެންދަވާ ހޮސްޕިޓަލަށް ބޭނުންވާ ސާމާނު ފިޔަވައި އެހެން ހުރިހާ ކަމެއް މިހާރުވަނީ ނިމިފައި ކަމަށް ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައި ވަނީ މިއަދު ކުރެއްވި ޓްވީޓެއްގައެވެ. "ރައީސް ޔާމީން އައްޑޫ ސިޓީގައި ބިނާކޮށްދެއްވަމުން ގެންދަވާ ހޮސްޕިޓަލުގެ މަސައްކަތް: ހޮސްޕިޓަލް އިކުވިޕްމެންޓްސް ލިބުމުން ނިމޭ ކަންކަން ފިޔަވައި ހުރިހާ ކަމެއް ނިމިފައި،" ޓްވީޓުގައި ވިދާޅުވެފައިވެއެވެ.
އައްޑޫކޮންވެންޝަން ސެންޓަރު ހޮސްޕިޓަލަކަށް ބަދަލު ކުރެއްވުމަށް ރައީސް ޔާމީން ސަރުކާރުން ޙަވާލުކުރައްވައިފައިވަނީ އެލިއާ ކޮންސްޓްރަކްޝަނާއެވެ. އެމަސައްކަތް ޙަވާލުކުރީ 2016 ވަނަ އަހަރު ނޮވެމްބަރު 14 ގައެވެ. އެ މަސައްކަތް އެކުންފުންޏާ ޙަވާލު ކުރީ އެންމެ ލަސްވެގެން ވެސް މިއަހަރު މެއިމަހަށް ނިންމާ ގޮތަށެވެ. އެހެންނަމަވެސް ތަފާތު ސަބަބުތަކާ ހެދި މަސައްކަތް ވަނީ ލަސްވެފައެވެ. މިއީ 161 މިލިއަން ރުފިޔާ ޚަރަދުކޮށްގެން އައްޑޫގައި ހަދަމުން ގެންދާ 100 އެނދުގެ ހޮސްޕިޓަލެކެވެ.
ޓާޝަރީ ފެންވަރަށް ތަރައްޤީ ކުރާ ހޮސްޕިޓަކަށް ބޭނުންވާ ސާމާނު އިންސްޓޯލް ކޮށްދޭނެ ބަޔަކު ހޯދުމަށް މީގެ ކުރިން ފިނޭންސުން އިޢުލާން ވެސް ކުރެއްވިއެވެ. އެހެންނަމަވެސް އަދި އެމަސައްކަތް ފެށިފައެއް ނުވެއެވެ. އެ ސާމާނު ހޯއްދެވުމާބެހޭ ގޮތުން ވެސް މިނިސްޓަރު އެއްޗެއް ވިދާޅުވެފައެއް ނުވެއެވެ.
