އިންތިޚާބީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު (އިބޫ) ޢުމްރާ ދަތުރުފުޅެއްގައި މާދަމާ ސަޢުދީއަށް ފުރާވަޑައި ގަންނަވަން ނިންމަވައިފިއެވެ.
އެމަނިކުފާނުގެ ތަރުޖަމާނު މާރިޔާ އަޙުމަދު ދީދީ ކުރެއްވި ޓްވީޓެއްގައި ވިދާޅުވެފައިވަނީ އިންތިޚާބީ ރައީސްގެ މިދަތުރުފުޅުގައި ސަޢުދީޢަރަބިއްޔާގެ އިސް މަސްއޫލު ވެރިންނާ ބައްދަލު ކުރައްވާ ގޮތަށް ހަމަޖެހިފައި ވާކަމަށެވެ.
ސަޢުދީއަށް ކުރައްވާ ދަތުރުފުޅަށްފަހު އިބްރާހީމް މުޙައްމަދު ޞާލިޙު އެނބުރި ރާއްޖެ ވަޑައިގަންނަވާނީ މި މަހުގެ 9 ވަނަ ދުވަހު ކަމަށް ވެސް މާރިޔާ ވިދާޅުވެފައިވެއެވެ.
އިބްރާހީމް މުޙައްމަދު ޞާލިހު ވެރިކަމުގެ ހުވައި ކުރައްވާނީ މިމަހުގެ 17 ވަނަ ދުވަހުއެވެ. އެ ރަސްމިއްޔާތު އޮންނާނީ އެދުވަހު ހަވީރު 5:00 ގައި ގަލޮޅު ބޯޅަ ދަނޑުގައެވެ. އެއީ ރަސްމިއްޔާތު ބާއްވަން އިންތިޚާބީ ރައީސް ބޭނުންފުޅުވި ތަން ކަމަށް ރައްޔިތުންގެ މަޖިލީހުގެ ނާއިބު ރައީސް މޫސާ މަނިކު ވަނީ ވިދާޅުވެފައެވެ.
ސަޢުދީ ރަސްގެފާނުގެ ދަޢުވަތަކަށް އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ވެސް ވަރަށްފަހުން ވަނީ ސަޢުދީއަށް ވަޑައިގެން އެޤައުމުގެ ސަރުކާރުގެ އިސްބޭފުޅުންނާ ބައްދަލު ކުރައްވައިފައެވެ.
