ނިމިގެންދިޔަ ރިޔާސީ އިންތިޚާބަށް ފަހު ހަމަހިމޭންކަން ޚިޔާރު ކުރެއްވީ ގައުމުގެ ސުލްޙައަށް ޖާގަ ދެއްވަން ކަމަށާއި ކުރިޔަށް ދެން އޮތީ ސިޔާސީ މަސައްކަތަށް ހުސްވާން ނިންމާފައިވާ ދުވަސްތަކެއް ކަމަށް އިންތިޚާބުގައި ރައީސް އަބްދުﷲ ޔާމީންގެ ރަނިންމޭޓްކަން ކުރެއްވި ޑރ މުޙަންމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ޝަހީމް އޭނާގެ ފޭސްބުކް ޕޭޖުގައި މީގެކުޑައިރުކޮޅެއް ކުރިން ވިދާޅުވެފައި ވަނީ އިންތިޚާބަށް ފަހު އޭނާ ހަމަހިމޭންކަން ޚިޔާރު ކުރެއްވީ އެއްގޮތަކަށްވެސް މައިދާނުން ދުރަށް ވަޑައިގަންނަވަން ވެގެން ނޫން ކަމަށެވެ. އަދި ކުރިއަށް އޮތީ އޭނާގެ ސިޔާސީ މަސައްކަތުގެ އާ ދުވަސްތަކެއް ކަމަށް ވިދާޅުވިއެވެ.
"މިމަހުގެ މެދެއްހާ ހިސާބުގައި އިސްލާމީ ދައުވަތާއި، ސިޔާސީ މަސައްކަތަށް އަޅުގަނޑު ހުސްވާނަމެވެ." ޝަހީމް ލިޔުއްވާފައިވެއެވެ.
ޝަހީމް ވިދާޅުވީ އޭނާގެ އަޒުމެއް ނުގުޑާނެ ކަމަށާއި މި މަސައްކަތުގައި އޭނާއަށް ހުރިހާ ފަރާތްތަކުންވެސް ހެޔޮ ދުއާ ކޮށްދެއްވުން އެދޭކަމަށެވެ. އަލުން އެނބުރި ސިޔާސީ މައިދާނަށް ވަޑައިގަންނަވާ ކަމުގެ ޚަބަރު ދެއްވި ނަމަވެސް ޝަހީމް ދެން ފެނިގެންދާނީ ސިޔާސީ ގޮތުން ކޮންބަޔަކާއެކު ކަމެއް ވިދާޅެއްނުވެއެވެ. ޝަހީމްއަކީ ޕީޕީއެމްގެ މެމްބަރެކެވެ.
ޑރ ޝަހީމް މިފަދައިން މިވިދާޅުވީ އޭނާގެ ޒަމާންވީ ރަޙްމަތްތެރިޔާ އަދާލަތު ޕާޓީގެ ރައީސް ޝައިޚް އިމްރާން އަބްދުﷲ މީޑިޔާގައި ޝަހީމްއާބެހޭ ގޮތުން ވާހަކަތަކެއް ދެއްކެވިތާ ގިނައިރުތަކެއް ނުވަނީހެވެ. ޝައިޚް އިމްރާން ވިދާޅުވެފައި ވަނީ ރަޙްމަތްތެރިކަން އޮންނާނެ ކަމަށާއި ނަމަވެސް ސިޔާސީ މަސައްކަތް ދެން ޝަހީމްއާއެކު ނުކުރެއްވޭނެ ކަމަށެވެ.
ރިޔާސީ އިންތިޚާބުގެ ނާކާމިޔާބަށް ފަހު ޑރ ޝަހީމް ސިޔާސީ މަސްރަހުން ކުޑަކޮށް އެއްފަރާތް ވުމުން ބަޔެއް މީހުން ބުނަމުން އައީ އިންތިޚާބަށް ފަހު ޝަހީމްވެސް ސިޔާސީ ކަންކަމާއި ދުރަށް ވަޑައިގެންނެވީ ކަމަށެވެ. އިންތިޚާބަށް ފަހު ޕީޕީއެމުން ކުރިޔަށް ގެންދިޔަ ސިޔާސީ ހަރަކާތްތަކުންވެސް ޝަހީމް ނުފެނެއެވެ.
