އެމެރިކާގެ ރައީސު ޑޮނާލްޑް ޓްރަމްޕް ނޯތު އެޓްލާންޓިކް ޓްރީޓީ އޮގަނައިޒޭޝަން (ނޭޓޯ) ގެ ބަދަހިކަމާމެދު ޝައްކު އުފެއްދެވިޔަސް އެ ޖަމާއަތް އޮތީ ބަދަހިކޮށް ބާރުގަދަކޮށްކަން ރަޝީޔާއަށް ދެއްކުމަށްޓަކާ، ފިނި ހަނގުރާމައަށް ފަހު ނޭޓޯއިން ބާއްވާ އެންމެ ބޮޑު އަސްކަރީ ތަމްރީނުތައް މިއަދު ނޯވޭގައި ފަށައިފިއެވެ.
31 ގައުމަށް ނިސްބަތްވާ ފަންސާސް ހާހެއްހާ ސިފައިންނާ، ދިހަ ހާހެއްހާ އަސްކަރީ އެއްގަމު އުޅަނދާ، 650 ކަނޑުގެ އުޅަނދާ، 250 އަސްކަރީ މަތިންދާބޯޓާ އެކު 'ޓްރައިޑެންޓް ޖަންކްޗާ 18" ތަމްރީނުތައް ފަށާފައި ވަނީ ދުޝްމަން ގައުމަކުން ނޭޓޯގެ މެންބަރު ގައުމަކަށް އުދުވާނީ ހަމަލާއެއް ދީފިނަމަ، އެގައުމު ދިފާއުކުރުމުގެ ތަމްރީނުތަކެއް ހެދުމަށެވެ.
"މި ފަހުގެ އަހަރުތަކުގައި ޔޫރަޕްގެ ސަލާމަތީ މާހައުލު ވަނީ ވަރަށް ބޮޑަށް ދަށު ދަރަޖައަކަށް ގޮސްފައި" ތަމްރީނުތައް ފުށުމާ ގުޅިގެން ވާހަކަފުޅުދައްކަވަމުން ނޭޓޯގެ ސެކްރެޓަރީ ޖެނެރަލް ޔެންސް ސްޓޯލްޓެންބާގް ވިދާޅުވިއެވެ.
"ޓްރައިޑެންޓް ޖަންކްޗާ އަކީ އަހަރުމެންގެ މެންބަރު ގައުމުތަކަށްވެސް، އަހަރުމެންނާ ދުޝްމަންވެދާނެ ގައުމަކަށްވެސް ދެވޭ ސާފު މެސެޖެއް. ނޭޓޯއިން ކުރިމަތިލާކަށް ބޭނުމެއް ނުވޭ. އެހެންނަމަވެސް، ކޮންމެ ނުރައްކަލަކާ ދެކޮޅަށް އަހަރުމެންގެ ބައިވެރިން ހިމާޔަތްކުރަން އަހަރުމެން މިތިބީ ތައްޔާރަށް." އޭނާ ވިދާޅުވިއެވެ.
"ދުޝްމަންވެދާނެ" ގައުމަކީ ކޮން ގައުމެއްކަން ވިދާޅުނުވިނަމަވެސް، އެންމެންގެ ވިސްނުމަށް އަންނާނީ ރަޝިޔާއެވެ.
ރަޝިޔާއިން ވަނީ މިފަހަކަށް އައިސް އެގައުމުގެ އަސްކަރީ ބާރުވެރިކަން ދައްކާލާފައެވެ. އެގޮތުން ކްރައިމިޔާ ރަޝިޔާގެ ބަޔަކަށް ހަދައި، އިރުމަތީ ޔުކްރޭނުގައި ހަމަނުޖެހުން އުފައްދައި، އާކްޓިކްގައި އަސްކަރީ ބާރު ވަރުގަދަކޮށް، ފާއިތުވި ސެޕްޓެންބަރު މަހު ރަޝިޔާގެ އެންމެ އިރުމަތީގައި ބިޔަ އަސްކްރީ ތަމްރީނުތަކެއް ބާއްވާފައި ވެއެވެ.
ނޯވޭގެ ވެރިރަށް އޮސްލޯގައި ހުންނަ ރަޝިޔާ އެނބަސީން ބުނެފައި ވަނީ 'ޓްރައިޑެންޓް ޖަންކްޗާ' އަކީ "ރަޝިޔާއާ ދެކޮޅު" ތަމްރީނުތަކެއް ކަމުގައެވެ.
"ނޭޓޯގެ ބޮޑެތި ގައުމުތަކުން ދަނީ ރަޝިޔާއާ ކައިރި ސަރަހައްދުގަ އަސްކަރީ ހަރަކާތްތައް އިތުރުކުރަމުން." ރަޝިޔާގެ ޚާރިޖީ ވުޒާރާގެ ތަރުޖަމާނު މާރިޔާ ޒަޚަރޯވާ ބުންޏެވެ.
"އެފަދަ ޒިންމާދާރުކަމެއް ނެތް އަމަލުތަކުގެ ސަބަބުން އުތުރުގައި ސިޔާސީ ނުތަނަަވަސްކަން އިތުރުވާނީ." އޭނާ ބުންޏެވެ.
ނޭޓޯގެ 29 މެންބަރު ގައުުމުތަކުގެ އިތުރަށް ނޭޓޯގެ އަވަށްޓެރި ގައުމުތައް ކަމުގައިވާ ސްވިޑަންއާއި ފިންލޭންޑުންވެސް ދަނީ މި ތަމްރީނުތަކުގައި ބަައިވެރިވަމުންނެވެ.
