އިސްތަންބޫލުގައި ހުންނަ ސައޫދީ އަރަބިއްޔާގެ ކޮންސިއުލޭޓުގައި އެގައުމުގެ ނޫސްވެރިޔާ ޖަމާލު ޚާޝުޤްޖީ މަރާލާފައިވަނީ އެކަމށް ކުރިން ރާވައި ތައްޔާރުވެގެން ކަމަށް ތުރުކީގެ ރައީސު ރަޖަބް ޠައްޔިބު އެރްދޮޣާން މިއަދު ވިދާޅުވެއްޖެއެވެ.
ވެރިކަންކުރާ ޖަސްޓިސް އެންޑް ޑިވެލޮޕްމަންޓް (އޭކޭ) ޕާޓީގެ ޕާރލަމެންޓްރީ ގްރޫޕްގެ ބައްދަލުވުގައި ތަގުރީރުކުރައްވަމުން އެރްދޮޣާން ވިދާޅުވި ގޮތުގައި އިސްތަންބޫލުގައި ހުންނަ ސައޫދީ ކޮންސިއުލޭޓަށް ފުރަތަމަ ޚާޝުޤްޖީ ދިޔައީ ފާއިތުވި ސެޕްޓެންބަރު މަހުގެ 28 ވަނަ ދުވަހުއެވެ. އަދި އެދުވަހުއްސުރެ ޚާޝުޤްޖީ މަރާލުމުގެ ރޭވުންތައް ފެށިފައިވާ ކަމުގައެވެ.
އެރްދޮޣާން ވިދާޅުވީ އޭނާ ސައޫދީ އަރަބިއްޔާއިން ގިނަ ސުވާލުތަކެއްގެ ޖަވާބު ބޭނުންފުޅުވާ ކަމުގައެވެ. ނަމަވެސް ޚާޝުގްޖީ މަރާލުމުގައި ސީދާ ސައޫދީ ޝާހީ އާއިލާގެ އަތެއްވާ ކަމުގައި އޭނާ ވިދާޅު ނުވެއެވެ.
ޚާޝުޤްޖީގެ މަރުގެ މައްސަލައިގައި "އެއްވެސް ފޮރުވުމެއް ނެތް ސީދާ ތެދު" ހާމަކުރައްވާނެ ކަމަށް ކުރިން ވިދާޅުވެފައިވީ ނަމަވެސް، މިހާރު ތުރުކީގެ ތަހުގީގީ އިދާރާތަކުން ކުރަމުންދާ ތަހުގީގުގެ ތަފްސީލުތައް އޭނާ ހާމަނުކުރައްވައެވެ.
ސައޫދީ ރަސްގެފާނު ސަލްމާން ބިން އަބްދުލްއަޒީޒަށް އިޝާރާތްކުރައްވައި އޭނާ ވިދާޅުވީ ސަލްމާން ރަސްގެފާނުގެ ތެދުވެރިކަމާމެދު އޭނާ ޝައްކުނުކުރާ ކަމަށާ، ރަސްގެފާނު އެ މައްސަލައިގައި ބައިވެރިވި މީހުންނަށް އަދަބުދެއްވާނެކަމަށް އޭނާ އުއްމީދުކުރައްވާކަމަށެވެ.
ޖަމާލު ޚާޝުޤުޖްގީ މަރާލުމަށް ރޭވި ގޮތުގެ ތަފްސީލު ދެއްވަމުން އެރްދޮޣާން ވިދާޅުވީ ސެޕްޓެމްބަރު މަހުގެ 28 ވަނަ ދުވަހު ޚާޝުޤްޖީ ސައުދީ ކޮންސިއުލޭޓަށް ދިއުމުން އޮކްޓޯބަރު މަހުގެ ދެވަނަ ދުވަހު އައުމަށް އޭނާއަށް އެންގުމަށް ފަހު ކޮންސިއުލޭޓުގެ މުވައްޒަފަކު ސައޫދީ އަރަބިއްޔާއަށް ފުރައިގެން ގޮސްފައިވާ ކަމުގައެވެ. އަދި ޚާޝުޤްޖީ މަރާލުމަށް ރޭވީ އޭނާ ސައޫދީ އަރަބިއްޔާއަށް ގޮސް ކުރި މަޝްވަރާތަކުގައިކަން ދޭހަވާ ގޮތަކަށް އެރްދޮޣާން ވަނީ ވާހަކަފުޅުދައްކަވާފައެވެ.
ރައީސު އެރްދޮޣާން އިތުރަށް ހާމަކުރެއްވި ގޮތުގައި އޮކްޓޯބަރު މަހުގެ ފުރަތަމަ ދުވަހު ތިން މީހުންގެ މައްޗަށް އެކުލެވޭ ސައުދީ ޓީމެއް އިސްތަންބޫލަށް އައެވެ. އަދި އެދުވަހު ސައޫދީ ކޮންސިއުލޭޓްގެ ޓިމެއް އިސްތަންބޫލު ކައިރީގައި އޮންނަ ބެލްގްރޭޑް ޖަންގައްޔަށާއި، ކައިރީގައި އޮންނަ ޔަލޯވާ ޕްރޮވިންސަށް ދިޔައެވެ.
ސައޫދީން ބުނެފައިވަނީ ޚާޝުޤްޖީ "މަރުވީ" ކޮންސިއުލޭޓުގައި ތިބި މީހުންނާ ޚާޝުޤްޖީއާ ދެމެދު ހިނގި ޒުވާބެއް ހޫނުވތަޅާފޮޅުމަކަށް ބަދަލުވެ، އޭނާ "ކަރުގައި މީހަކު ހިފުމުގެ" ސަބަބުން ކަމުގައެވެ. އެހެންނަމަވެސް، ރަހުމުކުޑަ މަރުގެ މައްސަލައިގައި ސައޫދީން ދައްކާ ވާހަކަ ގަބޫލުފުޅު ނުކުރައްވާކަން ހާމަކުރައްވަމުން އެރްދޮޣާން ވިދާޅުވީ "މަރާލެވުނީ ރާވައިގެން ކަމުގެ ހެކިތައް ޖަސޫސީ އަތި ސަލާމަތީ އިދާރާތަކުގައި އެބަހުރި...... އެފަދަކަމެއް ސަލާމަތީ އަދި ޖަސޫސީ މަދު ބައެއްގެ ބޮލުގައި އެޅުވުމުން ބައިނަލްއަގްވާމީ މުޖްތަމައަށް ގަބޫލުނުކުރެވޭނެ" ކަމުގައެވެ.
އޭނާ ވިދާޅުވީ އެކަމުގައި "އެންމެ އަޑިން ފެށިގެން ސީލިންގާ ހަަމައަށް" ބައިވެރިވާ އެންމެންގެ މައްސަލަ ތަހުގީގުކޮށް ތުރުކީގައި އެމީހުންގެ ޝަރީއަތް ހިންގަންޖެހޭ ކަމުގައެވެ.
ޖަމާލު ޚާޝުޤްޖީގެ ހަށިގަނޑާ ހަވާލުވީ އެ ރަށުގެ މީހެއް ކަމަށް ސައޫދީން ބުނެފައިވާތީ އެރްދޮޣާން ވަނީ އެމީހަކު ބުނެދިނުމަށް ސައޫދީންގެ ކިބައިން ތަކުރާރުކޮށް އެދިވަޑައިގެންފައެވެ. "އެމީހުންނަށް އެހީވި މިރަށު މީހަކީ ކޮބާ؟ އެމީހުން އެނާއަކީ ކާކުކަން ހާމަކުރަން ޖެހޭނެ." އެރްދޮޣާން ވިދާޅުވިއެވެ.
