ސެޕްޓެމްބަރު 23 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގެ ނަތީޖާ ގަބޫލުނުކޮށް ޕީޕީއެމުން ސުޕްރީމް ކޯޓަށް ވެއްދި މައްސަލައިގައި އިންތިޚާބު ބާތިލު ކުރެވެން ނެތް ކަމަށް ސުޕްރީމް ކޯޓުން ޙުކުމް ކޮށްފައި ވަނިކޮށް، އިންތިޚާބާބެހޭ މައްސަލައެއްގައި ޕީޕީއެމުން ޕޮލިހަށް ދިޔުމަކީ އަމިއްލަ ކަރަށް މަހާލެވޭ މަޅިއެއް ކަމަށް ރައްޔިތުންގެ މަޖިލީހުގެ މެމްބަރު އަޙްމަދު މަހްލޫފް ވިދާޅުވެއްޖެއެވެ.
މަހްލޫފް ވިދާޅުވީ ޕީޕީއެމުން ފުލުހުންގެ އިދާރާއަށް މައްސަލަތަކެއް ހުށަހެޅި ނަމަވެސް ފުލުސް އޮފީހުގައިވެސް ޕީޕީއެމް ބަލި ކުރައްވާނެ ކަމަށެވެ. ޕީޕީއެމުން ބުނެފައި ވަނީ ސުޕްރީމް ކޯޓުން އިންތިޚާބު ބާތިލު ކުރެވެން ނެތް ކަމަށް ޙުކުމް އިއްވި ނަމަވެސް އިންތިޚާބުގެ ތެރޭގައި ހިނގައިދިޔަ ބަޔެއް ކަންކަމުގައި އެޕާޓީން ޕޮލިހަށް މައްސަލަ ހުށަހަޅާނެ ކަމަށެވެ. އެގޮތުން ޕޮލިހަށް ހުށަހަޅަން ނިންމާފައިވާ ބަޔެއް ކަންކަން އެޕާޓީން ވަނީ ހާމަވެސް ކޮށްފައެވެ.
ނިމިދިގެން ދިޔަ އިންތިޚާބުގެ ނަތީޖާ ގަބޫލުނުކޮށް ޕީޕީއެމުން އެދުނީ އެ ނަތީޖާ ބާތިލުކޮށް އަލުން އިންތިޚާބެއް ބާއްވައި ދިނުމަށް އެދިއެވެ. ނަމަވެސް ސުޕްރީމް ކޯޓުގައި ކުރިޔަށްދިޔަ ޝަރީއަތުގެ ދިގު މަޖިލިސް ތަކަށް ފަހު އެ ކޯޓުގެ ހުރިހާ ފަނޑިޔާރުންގެ އިއްތިފާގުން ޙުކުމް އިއްވީ އިންތިޚާބު ބާތިލު ކުރާވަރުގެ އެއްވެސް އަސާސެއް ނެތް ކަމަށެވެ.
ނިމިގެންދިޔަ ރިޔާސީ އިންތިޚާބު އިދިކޮޅު ކޯލިޝަނުގެ ކެންޑިޑޭޓް އިބްރާހިމް މުޙަންމަދު ސޯލިޙް ކާމިޔާބު ކުރެއްވީ ބޮޑު ތަފާތަކުންނެވެ. އެއާއެކު މިހާރު ކުރިޔަށް ދަނީ ވެރިކަން ބަދަލު ކުރުމުގެ މަރުޙަލާއެވެ.
