ރައްޔިތުންގެ މަޖިލީހުގެ އިންތިޚާބު، އަންނަ އަހަރުގެ މާޗް މަހުގެ ފަހުކޮޅު ބާއްވަން ތައްޔާރުވަމުންދާ ކަމަށް އިލެކްޝަންސް ކޮމިޝަން (އީސީ) އިން ވިދާޅުވެއްޖެއެވެ.
ކޮމިޝަންގެ މެމްބަރު އަދި ތަރުޖަމާނު އަހްމަދު އަކްރަމް އާފަތިހަށް މައުލޫމާތު ދެއްވަމުން މިއަދު ވިދާޅުވީ އިންތިޚާބަށް ބޭނުންވާ ފައިސާ ވެސް ހަމަޖެހިފައިވާ ކަމަށެވެ.
އޭނާ ވިދާޅުވީ މިހާރު ވެސް ގެންދަވަނީ އިންތިޚާބު ބޭއްވުމުގެ ކަންކަމާބެހޭ ގޮތުން ސިޔާސީ ޕާޓީތަކާއި ކަމާ ގުޅުންހުރި އެހެން ފަރާތްތަކާ ވެސް ވާހަކަ ދައްކަވަމުން ކަމަށެވެ.
އޭނާ ވިދާޅުވީ މިހާރު ހިނގަމުންދާ ރައްޔިތުންގެ މަޖިލީހުގައި 85 މެމްބަރުން ތިއްބެވިޔަސް އަންނައަހަރު ބާއްވާ އިންތިޚާބުގައި ދެ ދާއިރާ ނުވަތަ ދެގޮނޑި އިތުރުވާނެ ކަމަށެވެ. ދެ ގޮނޑި އިތުރުވަނީ މާލޭ ދާއިރާ އަށެވެ. އެހެންކަމުން އީސީން މިހާރު ވަނީ އެކަމާބެހޭގޮތުން ސިޔާސީ ޕާޓީތަކާއި މާލޭ ދާއިރާތަކުގެ މިހާރުގެ މެމްބަރުންގެ ޚިޔާލުހުރި ގޮތް ހޯއްދެވުމަށް އެފަރާތްތަކާ ބައްދަލު ކުރައްވައިފައެވެ.
ކުރިއަށްއޮތް މަޖިލިސް އިންތިޚާބަށް ތައްޔާރުވުމުގެ މަސައްކަތް ބައެއް ފަރާތްތަކުން މިހާރުވެސް ވަނީ ފަށައިފައެވެ. އެގޮތުން އިދިކޮޅު ފަރާތްތަކުން ގެންދަވަނީ ރިޔާސީ އިންތިޚާބު ކާމިޔާބު ކުރެއްވި ފަދައިން މަޖިލީސް އިންތިޚާބުން ވެސް ބޮޑު ކާމިޔާބެއް ހޯއްދެވުމަށް ތައްޔާރުވަމުންނެވެ.
