އަފްޣާނިސްތާނުގެ ސަލާމަތީ ބާރުތަކުން ގާއިމުކޮށްފައިވާ ދެ ޗެކްޕޮއިންޓަކަށް ޠާލިބާން ހަނގުރާމަވެރިން ވަކިން ދިން ހަމަލާތަކެއްގައި ސަލާމަތީ ބާރުތަކުގެ 22 މީހުން މަރާލައިފިއެވެ. މަރުވި މީހުންގެ ތެރޭގައި ޑިސްޓްރިކްޓެއްގެ ޕޮލިހުންގެ ވެރިޔާވެސް ހިމެނެއެވެ. ޠާލިބާންގެ އަމާޒަކީ މިހަފުތާ ތެރޭގައި ބާއްވަން ހަަމަޖެހިފައިވާ އާއްމު އިންތިޚާބަށް ހުރަސްއެޅުން ކަމުގައި ބެލެވެއެވެ.
ބޭރު ގައުމުތަކުގެ ސިފައިން އަފްޣާނިސްތާނުން ނެރެލުމާއި، ހުޅަނގުގެ ތާއީދު ލިބިފައިވާ ސަރުކާރު ވައްޓާލުމާއި، އެމީހުން ގަބޫލުކުރާ ހަރުކަށި އުސޫލަތައް ތަންފީޒުކުރާ އިސްލާމީ ސަރުކާރެއް އަފްޣާނިސްތާނުގައި ގާއިމްކުރުމަކީ ޠާލިބާނުން ކުރާ ހަނގުރާމައިގެ މައިގަނޑު މަގުސަދުތަކެވެ.
ދެކުނުގެ ޕްރޮވިންސް ޒަބޫލްގެ މީޒާން ޑިސްޓްރިކްޓްގެ ފުލުހުންގެ ވެރިޔާ މަރާލާފައިވަނީ ޠާލިބާން ހަނގުރާމަވެރިންނާއެކު ހޮނިރުދުވަހުގެރޭ ބަދަލުކުރެވުނު ހަމަލާތަކެއްގައި ކަން އެ ޕްރޮވިންސުގެ ގަވަރުނަރު ރަޙްމަތުﷲ ޔަރްމަލް ހާމަކުރެެއްވިއެވެ.
ޠާލިބާން ހަނގުރާމަވެރިން ހުޅަނގުގެ ޕްރޮވިންސް ފަރަހުގައި ސިފައިންގެ 21 މީހުން މަރާލާފައި ވަނީ ޕޮޝްތޭ ރުދް ޑިސްޓްރިކްޓްގެ ޗެކް ޕޮއިންޓުތަކަށް ދިން ހަމަލާތަކެއްގައެވެ.
"އަހަރުމެންގެ ހަނގުރާމަވެރިން ވަނީ ދެ ޕްރޮވިންސެއްގައި ހޮނިހިރު ދުވަހުގެރޭ ފުލުހުންގެ ވެރިޔަކާ، އަފްޣާން ސިފައިންގެ 25 މީހުން މަރާލާފައެވެ." ޠާލިބާންގެ ތަރުޖަމާނު ޒަބީހުﷲ މުޖާހިދު ނެރުނު ބަޔާނެއްގައި ބުނެފައި ވެއެވެ.
ފާއުތި ހަފުތާގައި ޠާލިބާނުން ވަނީ 20 އޮކްޓޯބަރުގައި ބޭއްވުމަށް ހަމަޖެހިފައިވާ އާއްމު އިންތިޚާބު ބޮއިކޮޓުކުރުމަށް އަފްޣާން މީހުންނަށް ގޮވާލާފައެވެ. އެމީހުން ބުނާ ގޮތުގައި ބޮއިކޮޓުކުރަން ޖެހޭ ސަބަބަކީ އެމެރިކާ ސަފައިން އަފްޣާނިސްތުގައި ތިބުން އެއީ ހުއްދަކަމެއް ކަމުގައި ހެދުމަށް އެމެރިކާއިން އެ ވޯޓު ބޭނުންކުރުމެވެ.
އަފްޣާނިސްތާނު ސަރުކާރާއި، އެ ސަރުކާރަށް ތާއީދުކުރާ ގައުމުތަކުން ދެކެނީ އަފްޣާނިސްތާނުގައި މިމަހު ބާއްވާ އާންމު އިންތިޚާބަކީ އަންނަ އަހަރު ބާއްވަން ހަމަޖެހިފައިވާ ރިޔާސީ އިންތިޚާބަށް މަގުފަހިކުރުމަށް ކޮންމެހެެން ބޭނުން އިންތިޚާބެއް ކަމުގައެވެ. ނަމަވެސް ޠާލިބާންގެ ހަމަލާތަކާއި، އިންތިޚާބުގައި މަކަރުހަދަން މަަސައްކަތްކުރާކަމުގެ ތުހުމަތުތަކާއެކު މި އިންތިޚާބު ކާމިޔާބުކަމާއެކީ ބޭއްވިދާނެ ކަމާމެދު މިހާރު ވަނީ ސުވާލުއުފެދިފައެވެ.
