ވެރިކަން ބަދަލުވުމުގެ މަރުހަލާ ކުރިއަށްދާ މި ދަނޑިވަޅުގައި ދައުލަތުން މާލީ ޒިންމާއެއް އުފުލަމްޖެހޭ ވަރުގެ އެއްވެސް ކަމެއް ނުކުރުމަށް އިންތިޚާބީ ރައީސް އިބްރާހީމް މުހައްމަދު ސާލިހުގެ ފަރާތުން ފިނޭންސް މިނިސްޓްރީގައި އެދިވަޑައިގެންފިއެވެ.
އިބޫގެ ފަރާތްޕުޅުން، ޑައިރެކްޓަރ ޖެނެރަލް އޮފް ޓްރާންޒިޝަން، އަހުމަދު ލަތީފް ވިދާޅުވެފައިވަނީ ދައުލަތް ޒިންމާވާންޖެހޭ މާލީ އެއްވެސް މުއާމަލާތަކާއި، އެއްވެސް އައު މަޝްރޫއެއް މި މުއްދަތުގައި ނުފެށުމަށާއީ އައު މަޝްރޫއެއް ބީލަމަށް ނުލުމަށެވެ. އަދި ދައުލަތުން އެއްވެސް ލޯނެއް ވެސް މިދުވަސްވަރު ނުނެގުމަށް އެދިވަޑައިގެންފައިވެއެވެ.
އިބްރާހީމް މުހައްމަދު ސާލިހުގެ ތަރުޖަމާނު މާރިޔާ އަހުމަދު ދީދީ ވިދާޅުވެފައިވަނީ ވެރިކަމުގެ ބާރުތައް ހަވާލުކުރުމުގެ މަރުހަލާ ވަރަށް އޮމާންކަމާއެކު މިހާރު ވެސް ކުރިއަށްދާ ކަމަށެވެ.
ވެރިކަމުގެ ބާރުތައް ހަވާލުކުރުމުގެ މަރުހަލާގައި އިބްރާހީމް މުހައްމަދު ސާލިހުގެ ފަރާތްޕުޅުން މިހާރު ގެންދަވަނީ ދައުލަތުގެ މިނިސްޓަރުނާއި، މުއައްސަސާތަކާ ވެސް ބައްދަލު ކުރައްވަމުންނެވެ.
މި މަރުހަލާ ކުރިއަށްދާއިރު ރިޔާސީ އިންތިޚާބުގެ ނަތީޖާއާމެދު ޝައްކު އުފައްދަވައި ޕީޕީއެމްއިން ގެންދަނީ އިޖުތިޖާޖު ކުރަމުންނެވެ. އެގޮތުން މިރޭވެސް އެޕާޓީގެ އިހުތިޖާޖެއް ފަށައިފައެވެ.
ސެޕްޓެމްބަރު 23 ގައި ބޭއްވި ރިޔާސީ އިންތިޚާބުގައި ރައީސް ޔާމީނާ ވާދަކުރައްވައި އިބްރާހީމް މުހައްމަދު ސާލިހު ކާމިޔާބު ކުރެއްވީ 58 އިންސައްތަ، 42 އިންސައްތައިގެ ތަފާތަކުންނެވެ.
