ޕީޕީއެމަކީ އެއްވެސް ކަމަކާ ނުލައި މަގުމައްޗަށް ނުކުމެ މުޒާހަރާ ކުރާބައެއް ނޫންކަމަށާއި އެޕާޓީން ރޭ މުޒާހަރާއަށް ނުކުތީ ބަޔަކު ގޯސްތަކެއް ހެދުމުން ކަމަށް ރައީސުލްޖުމްހޫރިއްޔާ އަދި ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕީޕީއެމުން މާލޭގައި ރޭ ބޭއްވި މުޒާހަރާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ހުސްވިމަހުގެ 23 ވަނަ ދުވަހު ބޭއްވި ރިޔާސީ އިންތިޚާބުގައި ރައްޔިތުން އެމަނިކުފާނަށް ދެއްވީ ނުވަދިހަ ހާސް ވޯޓު ނޫންކަމަށެވެ. އިލެކްޝަންސް ކޮމިޝަނުން ވަނީ ވޯޓަށް ނުފޫޒުފޯރުވައިފައިކަން ލީކުވެފައިވާ އޯޑިއޯއިން ސާފުވާ ކަމަށް ވެސް ވިދާޅުވިއެވެ. ލީކުވެފައިވާ އޯޑިއޯގައި ވާހަކަ ދައްކަވަނީ ޝަރީފާއި އެހެން މީހެކެވެ. އޭގައި ސީދާ އިންތިޚާބަށް ނުފޫޒުފޯރުވި އެއްވެސް ވާހަކައެއް ކަނޑައެޅިގެން ބުނެފައެއް ނުވެއެވެ. އެހެންނަމަވެސް އޭގައި ވާހަކަ ދައްކަވާ ޝަރީފްގެ އެކުވެރިޔާ ކޮންމެ ވެސް ކަމަކާ ހާސްވެގެން އުޅޭތީ އެއްވެސް ކަމެއް ނުވާނެ ކަމަށް ޝަރީފް ބުނެފައިވެއެވެ.
އެކަމާ ބެހޭގޮތުން ޝަރީފް ވިދާޅުވެފައިވަނީ އެއީ އެކިފަހަރު މަތިން އޭނާ ދައްކާފައިވާ ވާހަކަތައް ރެކޯޑުކޮށްގެން އެޑިޓްކޮށްފައިވާ އެއްޗެއް ކަމަށެވެ. އެމައްސަލަ ފުލުހަށް ހުށަހަޅަން ގަސްތު ކުރައްވާ ކަމަށް ވެސް ވިދާޅުވިއެވެ.
ރައީސް ރޭ ވިދާޅުވީ ރައްޔިތުންގެ ސުވާލުތަކަށް އިލެކްޝަންސް ކޮމިޝަނުން ޖަވާބުދާރީ ވާންޖެހޭނެ ކަމަށެވެ. އިލެކްޝަންސް ކޮމިޝަނުގެ ޖަވާބަކީ ރައްޔިތުންނަށް ފިނިކަމެއް ގެނެސްދޭނެ ޖަވާބަކަށް ވާންޖެހޭނެ ކަމަށް ވެސް ރައީސް ވިދާޅުވިއެވެ. އެފަދަ ޖަވާބެއް ދެއްވަންދެން މުޅި ރާއްޖޭގައި މުޒާހަރާތައް ކުރިއަށް ގެންދިޔުމަށް ވެސް ރައީސް ގޮވައިލެއްވިއެވެ. މީހަކު ގޯހެއް ހަދަންދެން އެމީހަކީ އިޚުލާސްތެރިއެއް ކަމަށް ގަބޫލު ކުރައްވާ ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު އަދިވެސް ގާނޫނާއި ގަވާއިދާ ޚިލާފަށް ކަމެއް ނުކުރައްވާނެ ކަމަށެވެ. ޕީޕީއެމުން އިލެކްޝަންސް ކޮމިޝަނާ ބައްދަލު ކުރައްވައި ކަންހިނގާފައިވާގޮތް އޮޅުން ފިލުވާނެ ކަމަށެވެ.
