މިމަހުގެ 23 ވަނަ ދުވަހު އޮތް ރިޔާސީ އިންތިޚާބުން ނާކާމިޔާބުވެވަޑައިގަތުމުން އަދިވެސް އެކަން ގަބޫލުފުޅު ކުރައްވަން އުދަނގޫފުޅު ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެއެވެ.
ޕީޕީއެމްގެ ޚާއްސަ ކޮންގްރެސްގައި އެޕާޓީގެ ކޮންގްރެސްގައި ބައިވެރިވި މެމްބަރުންގެ އިއްތިފާގުން ޕީޕީއެމްގެ ރައީސް ކަމަށް އިންތިޚާބުވެވަޑައިގަތުމަށް ފަހު މިރޭ ކޮންގްރެސްގައި ވާހަކަފުޅު ދައްކަވަމުން ރައީސް ވިދާޅުވީ އިދިކޮޅު ކޯލިޝަނުގެ ކެންޑިޑޭޓް އަތުން އެމަނިކުފާނަށް ނާކާމިޔާބީއާ ކުރިމަތިވުމުން އެކަން އަދިވެސް ގަބޫލުފުޅު ކުރައްވަން ދަތިފުޅުވަނީ ރައްޔިތުންނަށް ވަރަށްގިނަ ކަންކަން ކޮށްދެވިފައި ހުރުމުން ރައްޔިތުން އެކަންކަން ބަލައިގަނެ ހިތްހަމަޖެހުމާއެކު އެމަނިކުފާނަށް ވޯޓު ދެއްވާނެ ކަމަށް ކުރިން ހީކުރެއްވިފައި އޮތުމުން ކަމަށެވެ.
އިންތިޚާބުން ބަލިވުމުން އެކަން ގަބޫލުފުޅު ކުރައްވަން އުދަނގޫފުޅު ވިޔަސް ރައީސް ވިދާޅުވީ މިއަހަރުގެ ނޮވެމްބަރު މަހުގެ 17 ވަނަ ދުވަހު އިބްރާހިމް މުޙަންމަދު ސޯލިޙްގެ ވެރިކަމެއް ފެށިގެންދާނެ ކަމަށާއި އެއަށް ފަހު ޕީޕީއެމް އޮންނާނީ ޒިންމާދާރު އިދިކޮޅު ޕާޓީއެއްގެ ގޮތުގައި ކަމަށެވެ. އެއާއެކު ޕީޕީއެމްގެ ސަޕޯޓަރުން މުޒާހަރާއަށްވެސް ނުކުންނަން ޖެހޭނެ ކަމަށާއި ރަށްރަށަށްވެސް ދަތުރު ކުރަން ޖެހޭނެ ކަމަށް ރައީސް ވިދާޅުވިއެވެ. އެހެންވެ އެއްވެސް މެމްބަރަކު ޕާޓީ ދޫކޮށް ނުގޮސް އެމަނިކުފާނާއެކު އަބަދުވެސް ތިބުމަށް މިރޭ ސަޕޯޓަރުންނަށް އިލްތިމާސް ކުރެއްވިއެވެ.
އިންތިޚާބުން ނާކާމިޔާބު ވުމުން އެކަން އެހެން އެވީ ކީއްވެގެންތޯ ސާފު ކުރުމަށް ރައްޔިތުންނަށް އެމަނިކުފާނު ވަނީ އެތަކެއް ސުވާލެއް މިރޭ ކުރައްވާފައެވެ.
ރައީސް ވިދާޅުވީ އެމަނިކުފާނުގެ ފަސް އަހަރުގެ ދައުރުގައި މި ސަރަހައްދުގެ އެހެން އެއްވެސް ގައުމެއް ތަރައްގީގައި ކުރިޔަށް ނުދާވަރަށް ތަރައްގީ ގެނެސްދެވިއްޖެ ކަމަށާއި ނަމަވެސް ގެނެސްދެއްވި ތަރައްގީއާ އެއްވަރަށް އެމަނިކުފާނަށް ވޯޓު ނުލިބުނީ ކީއްވެގެންތޯ ސުވާލު އުފެދޭ ކަމަށެވެ. އެގޮތުން އެމަނިކުފާނުގެ ސަރުކާރުން ރައްޔިތުންނާ ހަމައަށް ގެނެސްދެއްވި އަގުބޮޑު ބުރިޖާއެކު ހުޅުމާލޭގައި އުޅޭ ރައްޔިތުންނަށް ލިބުނު ފަސޭހައާއެކު އެމަނިކުފާނަށް ވޯޓު ދެއްވާނެ ކަމަށް ހީފުޅު ކުރެއްވުނު ކަމަށް ވިދާޅުވިއެވެ.
"އަޅުގަނޑު ހިތަށް އެރީ އެބޭފުޅުންގެ ދަތުރުފަތުރު ފަސޭހަވުމާއި ދަތުރުފަތުރު އަމާން ވެގެން ދިޔައީމާ، ހީކުރީ އެބޭފުޅުން ގަބޫލު ކުރައްވާނެއޭ ރައީސް ޔާމީން ކަންތައްތަކެއް ކޮށްދީފިއޭ، އެހެނެއް ނުވި ދެއްތޯ" ރައީސް ވިދާޅުވިއެވެ.
ރައީސް ވިދާޅުވީ ވަރަށްގިނަ ޒުވާނުންނަށް ވަޒީފާގެ ފުރުޞަތުތަކެއްވެސް މި 5 އަހަރު ހަމަޖެއްސެވި ކަމަށާއި ދޮށީ އުމުރުގެ މީހުންނަށްވެސް އެމީހުންގެ ބޭނުންތައް ރަނގަޅަށް ފުދޭނެގޮތް ހައްދަވައި ދެއްވިކަމަށާއި ކޮންމެ މީހަކަށްވެސް އާންމުދަނީ ލިބޭ މިންވަރު އިތުރުކޮށް ދެއްވުނު ކަމަށާއި މާލޭގެ ބޮޑު ކުނިގޮނޑުވެސް ނައްތާލެއްވުނު ކަމަށާއި މިހުރިހާ ކަމަކާއެކު ރައްޔިތުން ހިތްހަމަޖެހިގެން އެމަނިކުފާނަށް ވޯޓު ދެއްވާނެ ކަމަށް ހީފުޅު ކުރެއްވުނު ކަމަށެވެ.
"ރައީސް ޔާމީން މިވަރުގެ ޚިދުމަތެއް ކޮށްދިނީމާ އެހެންވިތޯ؟" ރައީސް ވިދާޅުވިއެވެ.
"އެހެންވީމާ މިއަދުވެސް ލޮލުން ކަރުނަ ވެއްޓޭއިރުވެސް އަޅުގަނޑު ދަންނަވާލަން ބޭނުންވަނީ މިއީތޯއޭ އަޅުގަނޑުމެން ކަންތައް ކުރަންވާ ގޮތަކީ؟ ރައީސަށް އިންތިޚާބުގައި ގިނަބަޔަކު ވޯޓު ނުދެއްވުމުން ޝަކުވާގެ ރާގެއްގައި އަސަރާއެކު ވިދާޅުވިއެވެ.
