ސަރުކާރު ހިންގަވަން އިބްރާހީމް މުހައްމަދު ސާލިހު (ޕްރެޒިޑެންޓް އިލެކްޓް) އަށް ފަސޭހަ ކުރުމަށްޓަކައި ކުރިއަށްއޮތް ރައްޔިތުންގެ މަޖިލީސް އިންތިޚާބު ކާމިޔާބު ކުރެއްވުމަށް ވަރަށް ބޮޑަށް މަސައްކަތް ކުރައްވާނެ ކަމަށް އެމްޑީޕީން ވިދާޅުވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަ ދައްކަވަމުން އެމްޑީޕީގެ ޗެއާޕާސަން އަލްއުސްތާޒު ހަސަން ލަތީފް މިރޭ ވިދާޅުވީ ސަރުކާރު ހިންގެވުމަށް ފަސޭހަ ކުރުމަށްޓަކައި މަޖިލިސް އިންތިޚާބު ކާމިޔާބު ކުރުން ވަރަށް މުހިންމު ކަމަށެވެ. އެމަސައްކަތް ކުރައްވާނީ އެމްޑީޕީ އެކަނިނޫން ކަމަށްވެސް އޭނާ ވިދާޅުވިއެވެ.
ހަސަން ލަތީފް ވިދާޅުވީ އެމަސައްކަތް ކުރައްވާނީ އެމްޑީޕީއާއި އެޕާޓީއާ ގުޅިފައިވާ އެހެން ޕާޓީތަކުން ކަމަށެވެ. "އަޅުގަނޑުމެންގެ އެބަހުރި ތަޖުރިބާތަކެއް. އޭގެ ތެރޭގައި ހިތިތަޖުރިބާ ވެސް ގިނަ. އެމްޑީޕީގެ ސަރުކާރުގައި މަޖިލިސް ނުލިބުމުން ކުރަންޖެހުނު ތަޖުރިބާ ވެސް އެބަހުރި. މަޖިލިސް ކާމިޔާބުކުރަން މަސައްކަތްކުރާނީ އެތަޖުރިބާގެ މަތިން،" ހަސަން ވިދާޅުވިއެވެ.
ފަސްމަންޒަރު ޕްރޮގްރާމުގައި ވާހަކަ ދައްކަވަމުން ހަސަން ލަތީފް ވިދާޅުވީ އެބޭފުޅުންގެ ވެރިކަމުގައި ޕީއެސްއެމްވެސް އޭގެ ގޮތުގައި ފެނިގެންދާނެ ކަމަށެވެ. ޕްރޮފެޝަނަލްކޮށް އެމަސައްކަތް ކުރާ މީހުންނަށް އެފުސަތު ލިބިގެންދާނެ ކަމަށް ވެސް އޭނާ ވިދާޅުވިއެވެ. އެބޭފުޅުންގެ ވެރިކަމުގައި އެންމެނަށް ވެސް ހަމަހަމަ ފުރުސަތު ޕީއެސްއެމް އިން ލިބިގެންދާނެ ކަމަށް ވެސް ވިދާޅުވިއެވެ.
ހަސަން ވިދާޅުވީ އެބޭފުޅުންގެ ވެރިކަމުގައި ރާއްޖޭގެ މަސްލަހަތާއި އިންޑިއާކަނޑުގެ ސަލާމަތާއި ރައްކާތެރި ކަމަށް އަޅަންޖެހޭ ފިޔަވަޅުތައް އަޅާނެ ކަމަށެވެ. އެކަމަށްޓަކައި އިންޑިއާއާ ވެސް ގުޅުން ބަދަހިވެގެންދާނެ ކަމަށްވެސް ވިދާޅުވިއެވެ.
