ކުރިއަށް އޮތް ފަސް އަހަރުގެ ތެރޭގައި 18 އަހަރުން މަތީގެ ކޮންމެ ޒުވާނަކަށް ގެދޮރުވެރިކަން ހޯދައިދިނުމާއިއެކު ވަޒީފާ ބޭނުންވާ 18 އަހަރުން މަތީގެ ކޮންމެ ޒުވާނަކަށް ވަޒީފާގެ ފުރުސަތު ވެސް ފަހިކޮށްދެއްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ރ. އަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، އަލިފުއްޓަށް ވަޑައިގެން އެރަށުގައި ޤާއިމްކޮށްފައިވާ ނަރުދަމާ ނިޒާމްގެ ޚިދުމަތް ރަސްމީކޮށް ފަށްޓަވައިދެއްވުމުގެ ގޮތުން ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ. ސަރުކާރުން އަބަދުވެސް މަސައްކަތް ކުރައްވަނީ ޒުވާނުންނަށް ވަޒީފާގެ ފުރުސަތުތައް އިތުރުކޮށްދެއްވުމަށް ކަމަށްވެސް ރައީސް ވިދާޅުވިއެވެ.
ވ މިސަރުކާރުން މިހާތަނަށް ޒުވާނުންނަށް 76،000 އަށްވުރެ ގިނަ ވަޒީފާގެ ފުރުސަތު ތަނަވަސްކޮށްދެވިފައިވާ ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ
އެމަނިކުފާނު ވިދާޅުވީ ރައްޔިތުން ބޭނުން ވަނީ ތަރައްގީ ކަމަށާއި މިދައުރުގެ ތެރޭގައި ސިއްހީ ދާއިރާއާއި ތައުލީމީ ދާއިރާ ފަދަ ދާއިރާތައް ތަރައްގީ ކުރެއްވުމަށް ގިނަ މަސައްކަތްކަތްތަކެއް ކުރައްވައިފައިވާނެ ކަމަށެވެ. މީގެއިތުރުން މަސްވެރިކަމުގެ ސިނާއަތް ކުރިއެރުވުމަށް މަސައްކަތްތަކެއް ކުރެވިފައިވާކަން ފާހަގަ ކުރައްވައި ކުރިއަށް އޮތް ދައުރުގައި މަސްވެރިކަމުގެ ސިނާއަތަށް އަމާޒު ކުރައްވައިގެން ގިނަ މަސައްކަތްތަކެއް ކުރައްވާނެކަމަށް ވިދާޅުވިއެވެ.
ރައީސުލްޖުމްހޫރިއްޔާ މިހާރު މާޅޮސްމަޑުލު އުތުރުބުރިއާއި، މިލަދުންމަޑުލު ދެކުނުބުރީގެ ބައެއް ރަށްރަށަށް ކުރައްވަމުން ގެންދަވާ ތިން ދުވަހުގެ މިދަތުރުފުޅު ފެއްޓެވީ މިއަދު ހެނދުނެވެ.
