އަފްޣާނިސްތާނުގެ އިރުމަތީ ފަރާތުގައި އޮންނަ ޣަޒްނީ ޕްރޮވިންސުގެ ވެރިރަަށް ޣަޒްނީ ސަލާމަތީ ބާރުތަކުގެ ބާރުގެ ދަށަށް ހޮނިހިރު ދުވަހު ގެނެވިފައިވާ ކަމުގައި އަފްޣާނިސްތާނު ސަރުކާރުން ބުނެފިއެވެ. ބުރާސްފަތި ދުވަހުގެރޭ ޠާލިބާނުން ވަނީ އެ ރަށް ހިފުމަށް ވަރުގަދަ ހަމަލާއެއް ދީފައެވެ. ސަރުކާރުން އިތުރު ސިފައިން ފޮނުވައިގެން މިހާރު ޠާލިބާން ހަނގުރާމަވެރިން ފަހަތަށް ޖައްސާފައިވާ ކަމަށް ސަރުކާރުން ބުނެއެވެ.
ދާޚިލީ ވުޒާރާގެ ތަރުޖަމާނު ނަޖީބު ދާނިޝް ބުނިގޮތުގައި ސަރުކާރުގެ ސިފައިންގެ އިތުރު ފައުޖުތައް އެ ސަރަހައްދަށް ގޮސްފައެވެ. އެމީހުން ދަނީ ޣަޒްނީގެ އުތުރުގައި ޠާލިބާނުންނާއި ހަނގުރާމަކުރަމުނެވެ. އަދި ޠާލިބާނުން މިހާރު ތިބީ އެރަށަށް އެރޭ ހިސާބެއްގައެެއް ނޫެނެވެ.
"ހާލަތު މިވަނީ ހަމައަކަށް އެޅިފައި. ރަށް އެމީހުންގެ ބާރުގެ ދަށަކަށް ދެން ނުދާނެ." ދާނިޝް ބުންޏެވެ.
ބުރާސްފަތި ދުވަހުގެ ރޭ ދަންވަރު ދިން ވަރުގަަދަ ހަމަލާއެއްގައި ޠާލިބާނުންގެ އެތައް ސަތޭކަ ހަނގުރާވެރިން ޕޮލިސް ޗެކް ޕޮއިންޓުތަކަށް ހަމަލާދީ އެތަންތަނުގައި ރޯކުރުމަށްފަހު ޣަޒްނީއަށް އަރައި އެރަށުގެ މެދުތެރެއިން ބައެއް ހިފިއެވެ. އެހެންނަމަވެސް، ސަރުކާރުގެ ފަރާތުން ލިބޭ ޚަބަރުތައް ބުނާގޮތުގައި، ކާބުލުން ކަންދަހާރަށް ދަތުރުކުރާ މައި މަގުގައި އޮންނަ އިސްތިރާތީޖީ ގޮތުން މުހިއްމު އެ ރަށުގައި އެމީހުންނަށް މާ ގިނަ އިރަކު ނުތިބެވުނެވެ.
އެމެރިކާ ސިފައިންގެ ހެލިކޮޕްޓަރާއި ޑްރޯންގެ ހަމަލާތަކުގެ އެހީގައި، އަފްޣާން ސިފައިން ވަނީ ޠާލިބާނުން ފަހަތަށް ޖައްސާލައި ރަށުން ބޭރުކޮށް، ރަށް އަލުން ސަރުކާރުގެ ބާރުގެ ދަށަށް ގެެނެސްފައެވެ. އަފްޣާން ސިފައިންގެ ރައްދު ހަމަލާގައި ޠާލިބާން ހަނގުރާމަވެރިންގެ 150 މީހުން މަރުވެ ނުވަތަ ޒަޚްމްވެފައިވާ ކަމަށް ވެއެވެ. އަފްޣާން ސިފައިންނާއި އާއްމުންގެ 16 މީހަކު ވަނީ މަރުވެފައެވެ.
ކާބުލްގައި ހުންނަ އެމެރިކާ ސިފައިންގެ މަރުކަޒުން ބުނި ގޮތުގައި ހުކުރު ދުވަހު ހެނދުނު 8 ޖެހިއިރު ޣަަޒްނީގައި ހުންނަ ސަރުކާރުގެ ހުރިހާ އިމާރާތެއް ވަނީ ސަރުކާރު ސިފައިންގެ ބާރުގެ ދަށަށް ގެނެވިފައެވެ.
އަފްޣާން ސިފައިން މިހާރު ދަނީ ޠާލިބާނުން ފިލާ ތިބެދާނެތީ ރަށުގެ ހުރިހާ ގެތައް ފާސްކުރަމުންނެވެ.
ގާތްގަނޑަކަށް 1 އެއްލައްކަ 50 ހާސް މީހުންގެ އާބާދީއެެއް އޮންނަ ޣަޒްނީއަށް ޠާލިބާނުން ދިން ހަމަލާއަކީ މިފަހަކަށް އައިސް އެމީހުން ދިން އެންމެ ވަރުގަދަ ހަމަލާއެވެ.
