ޠޫފާނެއްގެ ތެރޭގައި އުތުރު މެކްސިކޯގެ ރަށަކުން އުދުއްސާލި އެގައުމުގެ ގައުމީ އެއާލައިން އެއަރޯމެކްސިކޯގެ މަތިންދާބޯޓެއް ވެއްޓި 49 މީހުން ޒަޚަމްވެއްޖެއެވެ. އުދުއްސާލިތަނާހެން ކައިރީގައިވާ ދަނޑުބިންތަކެއްގެ ތެރެއަށް ވެއްޓުނު ބޯޓުގައި އަލިފާން ރޯވިނަމަވެސް ބޯޓުން ދަތުރުކުރި 101 މީހުން ވަނީ މަރުނުވެ ސަލާމަތް ވެފައެވެ.
"ހާދިސާގައި އެއްވެސް މީހަކު މަަރުނުވާކަން މިހާރު ވަނީ ކަށަވަރު ކުރެވިފައެވެ." މެކްސިކޯ ގަޑިން އަންގާރަ ދުވަހު ހަވީރު 4:30 ގައި ޑުރާންގޯ ސިޓީއިން މެކްސިކޯ ސިޓީއަށް ފުރި އެމްބްރެއާ-190 މަރުކާގެ މަތިންދާބޯޓު ވެއްޓުމުގެ ހާދިސާއަށް ފަހު ކުރެއްވި ޓުވީޓެއްގައި ޑުރާންގޯ ސްޓޭޓްގެ ގަވަރުނަރު ހޯޒޭ އައިސްޕޫރޯ ވިދާޅުވެފައި ވެއެވެ.
އޭނާ ވިދާޅުވި ގޮޮތުގައި 49 މީހަކަށް ދަނީ ހޮސްޕިޓަލުގައި ފަރުވާދެމުންނެވެ. އަދި ބޯޓުން ދަތުރުކުރި ބައެއް މީހުން ބޯޓުން ނުކުތީ އަމިއްލައަށް ކަމާއި، އޭގެ ތެރޭން ބައެެއް މީހުން ގާތްތިމާގެ މީހުންނާ ބައްދަލުކުރަން ޑުރާންގޯ ސިޓީގެ އެއާޕޯޓަށް އެނބުރި ދިޔަކަންވެސް އޭނާ ފާހަގަކުރެއްވިއެވެ.
އެއަރޯމެކްސިކޯގެ ފްލައިޓް ނަންބަރު 2431 ވެއްޓުނު އިރު އެ ބޯޓު އޮތީ ފުރިފައި ކަމަށް ޚަބަރުތައް ބުނެއެވެ.
ބޯޓުން ސަލާމަތްވި ދަތުރުވެރިއަކު ބުނި ގޮތުގައި އޭނާއާއި އޭނާގެ އަންހެން ދަރިފުޅު ބޯޓުން ނުކުތީ އޭގައި ހެދިފައި ހުރި ބާގަނޑަކުންނެެވެ. އޭރުވެސް ބޯޓު އޮތީ ދުމުން ފުރިފައެވެ. އޭނާ އިތުރަށް ބުނި ގޮތުގައި ބޯ ވާރޭގެ ތެރޭގައި ބިމުން މައްޗަށް ކިރިޔާ އެރިތަނާ ބޯޓު ވެއްޓިއްޖެއެވެ.
ޑުރާންގޯ ސިޓީގެ ސިވިިލް ޑިފެންސް އެޖެންސީގެ ޑިރެކްޓަރު އިސްރާއީލް ސޮލާނޯ މެހިއާ ވިދާޅުވިގޮތުގައި ވެއްޓުނު މަތިންދާބޯޓު މައްޗަށް އެރިއެވެ. އެހެންނަމަވެސް ޠޫފާނުގެ ސަބަބުން ކުރީކޮޅު ވަތަށް ވެއްޓުނީއެވެ. އަދި އެންމެ ބޮޑަށް ޒަޚަމްވެފައި ވަނީ ބޯޓުގެ ޕައިލެޓެވެ.
މެކްސިކޯގެ ޓްރާންޕޯޓް ޑިޕާޓްމަންޓުގެ ވެރިޔާ ޖެރާރްދޯ ރުއީޒް އެޕަރްޒާ ވިދާޅުވި ގޮތުގައި ވެއްޓުނު މަތިންދާބޯޓުން ދަތުރުކުރީ 97 ފަސިންޖަރުންނާއި 4 ފަޅުވެރިންނެވެ.
ވެއްޓުނު މަތިންދާބޯޓަކީ 2014 ވަނަ އަހަރު އެމެރިކާގެ ރިޕަބްލިކް އެއާލައިނުން އެއަރޯމެކްސިކޯއަށް ކުއްޔަށް ގެނެސްފައިވާ ބޯޓެކެވެ.
