އާންމުންނަށް ހުޅުވާލައިގެން އެމްއެންޑީއެފުން އަންނަ އޮގަސްޓް މަހުގެ 1 ވަނަ ދުވަހު ބާއްވަން ހަމަޖެހިފައިވާ "ހެސަ ވާދަ 2018" މުބާރާތަށް އަގުހުރި އިނާމްތަކެއް ކަނޑައަޅައިފިއެވެ.
މި މުބާރާތަކީ، ދިވެހިން ޒަމާނުންސުރެ ކުރަމުން އައި މަސައްކަތްތަކާއި، ދިވެހި ޘަޤާފަތް ރަމްޒުކޮށްދޭ ގޮތަށް ވާދަވެރި އިވެންޓްތަކެއް ހިމަނައިގެން ކުރިއަށްގެންދިޔުމަށް ހަމަޖެހިފައިވާ މުބާރާތެއް ކަމަށް އެމްއެންޑީއެފުން ވިދާޅުވިއެވެ.
ސަރުކާރު އޮފީސްތަކާއި، ކުންފުނިތަކާއި، ކުލަބު ޖަމިއްޔާތަކަށް އަދި އަމިއްލަ ފަރާތްތަކަށް ވެސް ބައިވެރިވެވޭ ގޮތަށް އިންތިޒާމްކޮށްގެން ކުރިއަށްގެންދާ މި މުބާރާތުގެ އެއްވަނަ ޓީމަށް 50 ހާސް ރުފިޔާ ލިބޭނެއެވެ. ދެވަނަ ޓީމަށް 30 ހާސް ރުފިޔާ ލިބޭނެއެވެ. ތިންވަނައަށް ހޮވޭ ޓީމަކަށް 25 ހާސް ރުފިޔާ ދިނުމަށް ހަމަޖެހިފައިވާ ކަމަށް ވެސް އެމްއެންޑީއެފުން ވިދާޅުވެފައިވެއެވެ.
މުބާރާތަށް އާންމުންގެ ފަރާތުން ބޮޑު ތަރުހީބެއް ލިބެމުން އަންނަ ކަމަށާއި ބައެއް ފަރާތްތަކުގެ އެދުމުގެ މަތިން ބައިވެރިވާން ބޭނުންވާ ޓީމުތައް ރަޖިސްޓްރީ ކުރުމުގެ ފުރުޞަތު ވަނީ އިތުރު ވެސް ކޮށްފައި ކަމަށް އެމްއެންޑީއެފުން ވިދާޅުވިއެވެ. މިގޮތުން މި ޖުލައި މަހުގެ 15 ވަނަ ދުވަހުގެ ނިޔަލަށް ޓީމުތައް ރަޖިސްޓްރީ ކުރުމުގެ ފުރުޞަތު ވަނީ ހުޅުވާލާފައެވެ. ރަޖިސްޓްރީ ކުރަން ބޭނުންވާ ފަރާތްތަކުން އެމްއެންޑީއެފްގެ އިންފޮމޭޝަން އޮފިސަރަށް ރަސްމީ ގަޑީގައި ގުޅުއްވުމުން ނުވަތަ މެސެޖު ކުރައްވައިގެން ޓީމުތައް ނަންނޯޓު ކުރުމުގެ އިންތިޒާމް ހަމަޖެހިފައިވާ ކަމަސްވެސް އެތަނުން ވިދާޅުވިއެވެ.
މި މުބާރާތުގައި ބައިވެރިވާ ޓީމުތަކުގައި ހިމެނޭނީ އުމުރުން 18 އަހަރުވެފައިވާ ފިރިހެނުންނެވެ. އަދި ކޮންމެ ޓީމެއްގައި ރިޒާވަރުންނާއެކު 8 ބައިވެރިން ހިމަނަންޖެހެއެވެ. އިވެންޓްގައި އެއްފަހަރާ ވާދަކުރެވޭނީ 5 ބައިވެރިންނަށެވެ.
