ގުޅިފައިވާ ޕާޓީތަކުގެ ރިޔާސީ ކެންޑިޑޭޓަކީ އެމްޑީޕީގެ ޕާލަމެންޓްރީ ގްރޫޕުގެ ލީޑަރު އިބްރާހީމް މުހައްމަދު ސާލިހު ކަމަށް ކަނޑައަޅައި ރަނިންމޭޓަކަށް ހަމަޖައްސާނީ ޖުމްހޫރީޕާޓީގެ ބޭފުޅެއް ކަމަށް މިހާރުވަނީ ނިންމައިފައެވެ. އެހެންނަމަވެސް ރަނިންމޭޓަކަށް ވަޑައިގަންނަވާނީ ކޮންބޭފުޅެއް ކަމެއް އަދި ކަށަވަރު ވެފައެއް ނުވެއެވެ.
ޖުމްހޫރީޕާޓީގެ ލީޑަރުގެ މަސްއޫލިއްޔަތު މިވަގުތު އުފުއްލަވަމުން ގެންދަވާ އެޕާޓީގެ ޑެޕިޔުޓީ ލީޑަރު ޑރ. ހުސައން ރަޝީދު ހަސަން އާފަތިހަށް މައުލޫމާތު ދެއްވަމުން މިއަދު ވިދާޅުވީ ރަނިންމޭޓަކު ކަނޑައެޅުމުގެ ކަންކަން ކުރިއަށްދާ ކަމަށެވެ.
އޭނާ ވިދާޅުވީ ރަނިންމޭޓަކު ކަނޑައަޅާނީ ޕާޓީގެ އަސާސީ ގަވާއިދާ އެއްގޮތަށް ކަމަށެވެ. އެޕާޓީއަކީ ޑިމޮކްރަޓިކް ޕާޓީއެއް ކަމުން ހުރިހާ ކަމެއްވެސް ކުރިއަށްދާނީ އަސާސީ ގަވާއިދުގެ ތެރެއިން ކަމަށް އޭނާ ވިދާޅުވިއެވެ.
"ޕާޓީގެ ކަންކަން ހިނގާނީ ޕާޓީގެ އަސާސީ ގަވާއިދާ އެއްގޮތަށް. އަސާސީ ގަވާއިދުގައި ކަނޑައަޅައިފައި އެބަހުރި ކަންކަން ކުރަންޖެހޭނެ ގޮތް. އަސީސީ ގަވާއިދު ބުނާގޮތުން ރަނިންމޭޓް ކަނޑައެޅުމުގެ ކަންކަމަކީ އަސީގަވާއިދުގައި ކަނޑައަޅައިފައިވާ އިޖުރާއަތްކާ އެއްގޮތަށް ކުރަންޖެހޭ ކަމެއް. މިހާރު މަސައްކަތް ކުރަމުން މިދަނީ ޕާޓީގެ ގައުމީ ކައުންސިލް ބައްދަލުވުމެއް ބޭއްވޭތޯ. ޕާޓީގެ ކައުންސިލުން އެކަމާމެދު ގޮތެއް ނިންމަންޖެހޭނީ." ޑރ. ހުސައިން ވިދާޅުވިއެވެ.
އޭނާ ވިދާޅުވީ ފުރަތަމަ ބާއްވަންޖެހެނީ ކައުންސިލްގެ ބައްދަލުވުމެއް ކަމަށެވެ. ކަންތައް ކުރަންވާ ގޮތް ނިންމާނީ އެއީން ކަމަށް ވސް ވިދާޅޔވިއެވެ. "ކައުންސިލްގެ ބައްދަލުވުމެއް ބޭއްވުނިމާއި އެއިން ނިންމާނެ ކިހިނެތްކަން ކަންތައް ގެންދަންވީ. މީހާ (ރަނިންމޭޓު) ކަނޑައެޅުމަށް ކަންކުރަންވީގޮތް އޮތީ ވަރަށްރީޗަށް ބުނެދީފައި. އެކަން ކުރިއަށް ގެންދާނެ ހުރިހާ ގޮތެއްވެސް ކަނޑައެޅިގެންދާނީ އަސީސީ ގަވާއިދުގައި ބުނެފައިވާ ގޮތަށް. އެނޫން ގޮތަކަށް އެއްވެސް ކަމެއް ނުހިނގާނެ އިރާދަ ކުރެއްވިއްޔާ،" ޑރ. ހުސައިން ރަޝީދު ހަސަން ވިދާޅުވިއެވެ.
އޭނާ ވިދާޅުވީ ރަނިންމޭޓު ހޮވުމަށް ވޯޓުލާ ހާލަތުވެސް ހުންނާނެ ކަމަށެވެ. އަދި އެނޫން ހާލާތުވެސް ހުންނާނެ ކަމަށެވެ.
ޖޭޕީން ރަނިންމޭޓަކަށް ނެރޭނެ ތަޖުރިބާހުރި އެތައް ބަޔަކު އެބައުޅެއެވެ. ރައިސް އޮފީހުގެ ކުރީގެ މިނިސްޓަރ އަބްދުﷲ އަމީނެވެ. ރައީސް މައުމޫންގެ ދައުރުގައި ޓޫރިޒަމް މިނިސްޓަރުކަން ކުރެއްވި ޑރ. އަބްދުﷲ މައުސޫމެވެ. ގާސިމް އިބްރާހީމްގެ ހަގު އަނބި ކަނަބަލުން އާއިޝަތު ނަހުލާ ސިޔާސީ ދާއިރާއަށް ކިތަންމެ ހަގަކަސް އެމަގާމަށް އެންމެ އެކަށީގެންވަނީ އޭނާ ކަމަށް ޖެޕީގެ ރައީސް އަލީ ވަހީދު ވަނީ ވިދާޅުވެފައެވެ.
