މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާޤަށް ނިސްބަތްވާ ތަންތަން ބަލައި ފާސްކުރުމަށް ފުލުހުން ހިންގި އޮޕަރޭޝަން ނިމުނު އިރު ހޯދުނު އަގުބޮޑު ތަކެއްޗާއި، ނަގުދު ފައިސާގެ އަގު 273 މިލިއަން ޔޫއެސް ޑޮލަރަށް އަރާ ކަމުގައި މެލޭޝިޔާގެ ފުލުހުން ބުނެފިއެވެ.
1އެމްޑީބީ ފަންޑަށް ޚިޔާނާތްތެރިވި މައްސަލައިގެ ތަހުގީގު ތެރެއިން ހިންގުނު މި އޮފަރޭޝަނުގައި ގަހަނާގެ ތަފާތު ބާވަތްތަކުގެ 12000 އާއި، 30 މިލިއަން ޔޫއެސް ޑޮލަރުގެ އަގުހުރި، ތަފާތު 26 ގައުމެއްގެ ނަގުދު ފައިސާއާއި، 19.3 މިލިއަން ޑޮލަރުގެ އަގުހުރި 423 ގަޑިއަާއި، އަގު ބޮޑު އެހެނިހެން ސާމާނު ހޯދާފައި ވެއެެވެ.
"މިއީ މެލޭޝިޔާގެ ތާރީޚުގައި މިފަދަ އެންމެ ބޮޑު ހޯދުން" ތަފާތު ތަންތަނުން ހޯދުނު ތަކެތި އެއްކޮށް އަގުކުރުމުގެ މަސައްކަތް ނިންމުމަށް ފަހު، ފުލުހުންގެ ކޮމާޝަލް ކްރައިމް އިންވެސްޓިގޭޝަންގެ ވެރިޔާ އަމަރް ސިންގް އިއްޔެ ވިދާޅުވިއެވެ. އޭނާ ވިދާޅުވިގޮތުގައި ފެނުނު އަގުބޮޑު ތަކެތީގެ އަގު 1.1 ބިލިއަން ރިންގިޓަށް އަރައެވެ. އެއީ ގާތްގަނޑަކަށް 273 މިލިއަން ޔޫއެސް ޑޮލަރެވެ.
އަމަރް ސިންގް ވިދާޅުވި ގޮތުގައި ނަޖީބު ރައްޒާޤު ބޮޑުވަޒީރު ކަމުގައި ހުންނެވި އިރު އޭނާއަށް މުސާރައިގެ ގޮތުގައި މަހަކު ލިބިވަޑައިގަތީ 22827 ރިންގިޓު (5670 ޔޫއެސް ޑޮލަރު) އެވެ.
ނަޖީބު ރައްޒާޤެ އަނބިކަނބަލުން ރޯޒްމާ މަންސޫރަކީ އާދަޔާއި ޚިލާފަށް އަގުބޮޑުތަކެއްޗަށް ލޯބިކުރައްވާ ބޭކަނބަލެއް ކަމުގައި ވަނީ މަޝްހޫރުވެފައެވެ. އެކަން ނަޖީބުގެ މިލްކިއްޔާތުގައިވާ 6 ތަނަކުން ނެގުނު އަގުބޮޑު ގަހަނާއިން އެނގެއެވެ. އޭގެ ތެރޭގައި 1400 ހާރާއި، 2200 އަނގޮޓި ހިމެނެއެވެ. އެންމެ އަގުބޮޑު އެއްޗަކަށް ފެނިފައި ވަނީ 1.5 މިލިއަން ޔޫއެސް ޑޮލަރުގެ ހާރެކެވެ. މީގެ އިތުރަށް 13 މިލިއަން ޑޮރަލުގެ އަގުހުރި 270 ދަބަސް ފެނިފައިވާއިރު، 234 އައިނުވެސް ފެނިފައި ވެއެވެ.
މިތަކެތި އަދަދުކޮށް ހިސާބުކުރުމަށް އެއް މަސް ދުވަސް ހޭދަވެފައި ވެއެވެ.
މެލޭޝިޔާގައި އެންމެ ފަހުން ބޭއްވުނު އާއްމު އިންތިޚާބުުގައި ނަޖީބު ރައްޒާޤު ނާކާމިޔާބުވެވަޑައިގަތުމުގެ ސަަބަބަކީ އޭނާމެދު ކުރެވޭ ޚިޔާނާތާއި ފަސާދައިގެ ތުހުމަތުތަކެވެ. އެ އިންތިޚާބުގައި ބޮޑު ވަޒީރުކަން ހޯއްދެވި މަހާތީރު ވަނީ ނަޖީބުގެ ޚިޔާނާތު މައްސަލަތައް ފުރިހަމައަށް ތަހުގީގުކުރައްވާނެ ކަމަށް ވިދާޅުވެފައެވެ.
