ޖަލަށް މަސްތުވާތަކެތި ވައްދައިދޭ ކަރެކްޝަން ސާވިސްގެ މުވައްޒަފަކު ބަންދު ކޮށްފިއެވެ. އޭނާ ބަންދު ކޮށްފައިވަނީ ކަރެކްޝަންސް ސާވިސް އާއި ފުލުހުން ގުޅިގެން މާފުށީ ޖަލުގައި އިއްޔެ ހިންގި އޮޕަރޭޝަނެއްގައެވެ.
މި އޮޕަރޭޝަނުގައި ފުލުހުން ބަންދުކޮށްފައިވަނީ ސްޓާފް ސާޖެންޓެކެވެ. އެކަން ކަރެކްޝަނުން ވަނީ ކަށަވަރު ކޮށްދީފައެވެ. މިފަދަ އަމަލުތައް ހިންގާމީހުންނާ މެދު އަޅާ ފިޔަވަޅަކީ މުޅި އުމުރަށް ވަޒީއިން ވަކިކުރުން ކަމަށް ކަރެކްޝަނުން ވިދާޅުވިއެވެ. ފުލުހުން މިހާރު ގެންދަވަނީ މި މައްސަލަ ބަލަމުންނެވެ.
އިއްޔެ ބަންދުކުރި މީހާއަކީ ފައިސާ ދިނުމުން ޖަލަށް މަސްތުވާތަކެތި ވައްދައިދޭ މީހެކެވެ. އިއްޔެ އޭނާ ބަންދުކުރިއިރު ވަނީ 18840 ރުފިޔާ ވަނީ ފެނިފައެވެ. އެ ފައިސާ އަކީ މަސްތުވާތަކެތި ޖަލަށް ވެއްދުމަށް އެކި މީހުން ދީފައިވާ ފައިސާއެވެ. އޭނާ ބަންދު ކުރުމަށްފަހު ޓެސްޓްކުރި އިރުވަނީ މަސްތުވާތަކެއްޗަށް ޕޮޒިޓިވް ވެސް ވެފައެވެ.
ފުލުހުން ހިނގާ މިފަދަ އޮޕަރޭޝަން ތަކުގައި މީގެ ކުރިންވެސް ވަނީ މިފަދަ އަމަލުތައް ހިންގާ މީހުން އަތުލައި ފިޔަވަޅުވެސް އަޅައިފައެވެ.
