އަލް މަރުހޫމް ޑރ. އަބްދުލްމަޖީދު އަބްދުލް ބާރީއަކީ ހުރިހާ ކަމެއްވެސް ދީނީ ހަމަތަކުގެ ތެރެއިން ކުރެއްވުމަށް މަސައްކަތް ކުރެއްވި ބޭފުޅެއް ކަމަށް ރައީސް ނަޝީދު ސަރުކާރުގެ ކެބިނެޓުގައި ޑރ. މަޖީދާ އެކު މަސައްކަތް ކުރެއްވި އޭރޫގެ ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ޑރ. މަޖީދުގެ ތައުބީނުގެ ޖަލްސާގައި ވާހަކަ ދައްކަވަމުން އޭނާ ވިދާޅުވީ ސިޔާސީ ކަންކަމާއި އިގްތިސާދީ ކަންކަންވެސް ރާއްޖޭގައި ހިންގެންޖެހޭނީ ދީނީ ހަމަތަކުގެ މަތިން ކަމަށް އަބަދުވެސް ޑރ. މަޖީދު ވަކާލާތު ކުރައްވާ ކަމަށެވެ.
ރައީސް ނަޝީދުގެ ސަރުކާރުގައި ރާއްޖެއަށް ބޭރުން ހުށަހެޅި ބޮޑު އިންވެސްޓްމެންޓެއްގައި ކެސިނޯ ހިމެނޭތީ ކެބިނެޓުގައި އެކަމާ ޑރ. މަޖީދު ދެކޮޅު ހެއްދެވުމުން އެ މަޝްރޫއު ދޫކޮށްލެއްވި ކަމަށް އޭނާ ވިދާޅުވިއެވެ.
އެޖަލްސާގައި ޑރ. މަޖީދުގެ ދަރިފުޅު އަހުމަދު ފިރާޒު ވެސް ވާހަކަދެއްކެވިއެވެ. އޭނާ ވިދާޅުވީ ޑރ، މަޖީދު އެންމެ ބޮޑަށް އިސްކަން ދެއްވީ އިލްމީ ދިރާސާތަކަށާއި އިލްމު އުގަންނަވައި ދެއްވުމަށް ކަމަށެވެ. އޭގެ އިތުރަށް ސިޔާސީ އަދި އިޖުތިމާއީ ދާއިރާއަކީ ވެސް ޑރ. މަޖީދު ވަރަސް އިކަން ދެއްވި ދާއިރާތަކެއް ކަމަށް ވެސް ވިދާޅުވިއެވެ.
އިސްލާމީ މަރުކަޒުގައި ރޭ ބޭއްވި ޖަލްސާގައި ވާހަކަ ދައްކަވަމުން އަދާލަތު ޕާޓީގެ ނާއިބު ރައީސް އަލީ ޒާހިރު ވިދާޅުވީ ޑރ. މަޖީދަކީ ރާއްޖެއަށް ގިނަގުނަ ޚިދުމަތްތަކެއް ކުރެއްވި ބޭފުޅެއް ކަމަށެވެ. އެމަނިކުފާނުގެ ޚިދުމަތްތަކަކީ އަގުނުކުރެވޭ ވަރުގެ ޚިދުމަތްތަކެއް ކަމަށްވެސް އޭނާ ވިދާޅުވިއެވެ. އަދި ޑރ. މަޖީދަކީ ތެދުވެރި ވަފާތެރި ހިތްޖެޔޮ ބޭފުޅެއް ކަމަށްވެސް އޭނާ ވިދާޅުވިއެވެ.
މިޖަލްސާއަލީ އަދާލަތު ޕާޓީއާއި ޑރ. މަޖީދަށް ހެޔޮއެދޭ ފަރާތްތަކުން އިންތިޒާމް ކޮށްގެން ބޭއްވި ޖަލްސާއެކެވެ. ޑރ. މަޖީދު އަވަހާރަވީ އުމުރުފުޅުން 55 އަހަރުގައެވެ.
